Lunghkang Tsi Rung Magam Gun Masha Marai 20 Ram Hpe Hpyen Dap Kawn Rim Woi Mat Ai Lam

Pajau Media

April 22, 2026

Hpakant, Lunghkang mare na tsi rung hta Doctor ni hte tsi sara num ni mung lawm rai marai 20 ram hpe Myen Hpyen Dap pawng hpawm hpung gaw mani shana hkying 9 jan ten hta rim woi mat ai lam chye lu ai.

Lunghkang mare Mai tsi rung na Doctor, Nurse ni hte bungli galaw masha ni hpe hpyen dap hte P.T.Ts pawng hpawm hpung kawn rim woi mat ai re.

Myen hpyen dap pawng hpawm hpung gaw hpyen n-gun 30 ram hte Mai tsi rung de shang nna jep ai nna woi mat ai rai tim gara maga woi mat ai hpe gaw tup hkrak nchye lu ai nga tsun ai re.

Rim tim nkau ni gaw Sinat laknak galaw ai jak rung maga de woi mat ai nga tsun taw nga ai hpe ginra masha ni kawn chye lu ai.

Myen hpyen dap pawng hpawng hpung gaw Lunghkang mare Tada Gyi, Maw Si Zar mare shara hkan hta shara la dap dung da ai lam chye lu ai.

Lung hkang mare hta April 20 ya shani kaw na hpyen dap ni htu shadut shang wa nna, mung shawa dum nta du hkra shang nga ai hpe chye lu ai.

Dai hpang de gaw hkawm sa nga ai mung shawa ni hpe san jep rim la nna jahkrit shama ai ni galaw nga ai sha n-ga mung shawa ni a grumhpraw, lung seng, ta chyawp hte phone zawn rai ni hpe mung jep zing la taw ai hpe chye lu ai.

Dai ni April 22 ya shani hta Hpakant maga myen hpyen dap kawn hpyen shamu shamawt ai lam nga taw ai majaw lahkawng maga hpyen masa laja nga nna, shang lawt dap ni mung Hpakant-Namya-Ka Mai sa lam hpe nhtoi masat lam nnga ai sha pat da na hpe laika ndau da ai re.

Shiga-Htu Seng