Laknak Kaba Hkrak Kapaw Ai Majaw Mung Shawa Asak Si Sum Hkra Hkala Ai Lam Nga

Pajau Media

April 24, 2026

Hpakant ginra hta hpyen dap gaw laknak kaba hte majoi gap shadam nga ai majaw mung shawa asak si sum hkra hkala nga taw ai hpe chye lu ai.

April 23 ya shana hkying (10) ram hta Hpakant Hpyen Dap kawng kawn gap dat ai laknak kaba gaw Namahpyit Katholic hpyen yen shara hta wa kapaw ai majaw nawku jawng sin ai wa a kasha la sha asak si sum wa nna, mung shawa marai 2 mung hkra hkala wa ai lam chye lu ai.

Asak si sum ai wa gaw asak 13 ning re ai Sut Jat Awng re nna, kanu hte kanau gaw lagaw kaw laknak kaba hkyep hkra ai ana a majaw tsi tsi hkam la taw hpe chye lu ai.

Hpyen yen makau grup yin hta majan nnga ai sha hpyen dap kawn laknak gap gasat ai gaw mung shawa ni hpe shingte nna gasat nga ai re hpe ginra masha ni tsun ai re.

Myen hpyen dap pawng hpawm hpung gaw Hpyen dap kawng kaw na laknak kaba ni jahkring hkring gap gasat nga nna, lai wa sai April 7 ya shani hta mung Hpyen dap kawng kaw ai gap dat ai laknak kaba gaw Maw Si Za mare na dum nta kaw wa kapaw ai majaw la sha lahkawng hkra hkala ana lu wa ai re.

Shiga-Htu Seng