Hti Gyaing Ginra Hta S.K.S Kawn Jet Nbungli Bawm Jahkrat Ai Majaw Ginra Masha Hkra Hkala Si Sum Wa Ai Lam

Pajau Media

February 10, 2026

Sagaing mung Kata ginwang Hti Gyaing ginra Maungkung mare lawk Bugyikung mare hta mani shani ka-ang hkying (12) minute (48) aten laman myen hpyen dap kawn jet nbungli bawm wa jahkrat ai majaw ginra masha marai (3) si sum nna ma marai (2) hte yawng pawng marai (5) hkra hkala wa ai lam chye lu ai.

Lai wa sai January shata (28) ya manap hkying (5) aten kawn hpang nna Hti Gyaing ginra zing majan kalang bai hpang wa nna myen hpyen dap si sum ai lam law ai hta Hti Gyaing ginra kata mung masha ni nga ai mare hkan dasang bawm jahkrat htim gasat ai lam galaw wa ai.

“Hti Gyaing muklum hta myen hpyen dap ni gaw ginjaw rung mare balik dap gawdin pa hte jawng hkan dap jahkrat nna dap dung hpyen dap gaw nnga ai. Hti Gyaing muklum zing na matu nau pa nra sai ngu mai tsun ai rai tim myen hpyen dap ni gaw nbungli hte htim wa ai. Dai ni lani mi hta pa Hti Gyaing muklum kata bawm (2) lang jahkrat mat ai” ngu Hti Gyaing ginra kaw du taw ai shinggyim ahkaw ahkang shamu shamawk ai masha langai kawn tsun ai.

Myen hpyen dap si sum ai lam law ai hta shanhte gaw shawoi na zawn mung masha ni nga ai shara ni hta da sang bawm jahkrat ai ni galaw wa chye majaw mung masha ni nbungli gasat wa na hpe sadi ai hte gaduk htu da na matu tsun sadi jaw da ai re.

January (30) ya shani hta mung Maung Kung mare lawk Satsa mare hta jet nbungli hte (Pawng 500) bawm (2) jahkrat ai majaw dumsu (2) hte wa (2) si mat ai lam mung byin lai wa sai re.

Shiga-Kachin Pyi Tar