Myihprap Wan Nlu Ai Majaw Jawng Ma Ni Hte EV Cycle Lang Ai Ni Yak Hkak Hkrum Nga Ai Lam.

Pajau Media

12 Mrach 2026

Jinghpaw Mungdaw Myitkyina muklum hta ndai laman myihprap wan ding yang nlu ai majaw mung shawa ni yak nga ai hpe chye lu ai. Grau nna gaw Grade 12 san poi htai taw ai jawng ma ni yak nga ai sha n-ga EV cycle lang ai mung shawa ni mung mayak hkrum taw ai hpe Myitkyina ginra masha ni tsun ai.

Ya ten Myitkyina muklum hta myihprap wan aten masat na jaw taw ai raitim masat da ai aten laman wan nlu, wan sa ten rai tim aten kadun sha lu ai majaw grau nna gaw jawng ma ni hte EV cycle lang taw ai ni a matu mayak kaba hkrum nga ai hpe chye lu ai.

Myihprap wan mayak a majaw ginra masha ni gaw wan jak lu ai ni wan jak lang taw ai rai tim jak sau manu mung tsaw wa ai majaw grau yak nga nna EV cycle ni mung solar wan hpe lang nna wan n-gun bang lang ra taw ai madang re lam hpe chye lu ai.

Myihprap wan ding yang nlu taw ai majaw EV cycle ni wan n-gun bang ya ai service seng hkan grumhpraw jaw nna lang taw ra ai lam, wan n-gun bang ya ai seng ni gaw solar hpe mari shakap nna wan n-gun bang ya ai service seng ni hpaw wa ai lam chye lu ai.

Cycle amyu hpan hku hkan nna kalang bang yang 5000ks kaw na 8000ks du hkra jaw ra nna ya ten jak sau manu 92 1 liter kaw 9500ks kaw na 10000ks du hkra manu tsaw taw re.

Dai hte maren 2026 ning Grade 12 san poi htai taw ai jawng ma ni mung March shata praw 11 ya kaw na praw 17 ya du hkra galaw mat na rai nna myihprap wan nlu ai majaw laika hti ten hta mayak nga ai nga tsun dan ai re.

Jinghpaw Mungdaw kata myihprap wan hpe Chihpwi hka wan jak rung langai kaw na sha shabra jaw taw ai majaw Myitkyina muklum hte Moenyin muklum kata lani mi hta hkying hkum 6 sha shabra jaw lu ai lam ndau ai rai tim ta tut hta minute 10 hta kalang, minute 30 hta kalang hkying hkum 2/3 hta kalang jaw shabra nga nna wan kalang si yang 2-3ya ram wan si chye hpe Myitkyina ginra masha ni tsun ai.

Shiga - Htu Seng