Myen Mungdan Gaw Hkam Bawm Hte Hpyen Laknak A Majaw Si Hkala Law Dik Mungdan Tai Nga Sai Lam

Pajau Media

February 26, 2026

Myen Hpyen Dap mungdan daru magam zing madu ai 2021 hpang kaw nna Myen Mungdan kata laning hte laning hkam bawm, hpyen laknak ni a majaw mung masha si hkala hkrum ai law dik mungdan tai wa sai lam Landmine Monitor hpung ni a 2025 sumtang kaw nna chye lu ai.

Laning hte laning masha si hkala hkrum ai lam gaw htam 2 jan jan law jat wa ai re lam, ya na zawn si hkala hkrum ai hta tsa lam shadang 86 gaw gaw mung masha ni law malawng re lam tsun da ai re.

Shiga hta tang madun da ai gaw 2024 ning hta hkawm bawm hte hpyen laknak a majaw si hkala hkrum ai masha marai 2,029 nga ai lam, 2023 shaning hta gaw marai 1,003 nga ai lam, 2022 shaning hta gaw marai 545 nga ai lam tsun da ai re.

Lai wa sai 1999 shaning kaw nna rai yang Myen Mungdan kata bawm, hpyen laknak a majaw si hkala hkrum ai masha yawm htum marai 9,206 nga ai lam mung tsun da ai re. Raitim ta tut hta n dai hta grau law nga mai ai lam mung tsun maram da ai re hpe mung chye lu ai.

Myen Hpyen Dap gaw masha hpe masat tawn ai bawm ni hpe matut manoi gyin shapraw jai lang nga ai sha n-ga rudi amyu sha rawt malan hpung ni, PDF hpung ni mung bawm hkam ai lam ni nga ai hte 2024-2025 shaning ni hta hkam bawm jai lang ai lam dan dan leng leng law jat wa ai lam Landmine Monitor hpung ni tsun da ai re.

Myen Hpyen Dap gaw mung masha hpe hpyen ninggang shatai nna shawng lam hkan bawm tam na matu rim woi ai lam ni nga ai lam tang madun da ai hte n dai mabyin gaw shinggyim nau na tara upadi hpe tawt lai ai lam re nga nna mungkan shinggyim ahkaw ahkang hpung ni tsun da ai re.

Ya aten Myen Mungdan kata gasat gala majan gaw matut manoi byin nga ai re hte Tsi Rung, Tsi gawk ni hpe mung masat shingte gasat nga ai re majaw hkala hkrum ai masha ni hpe tsi gawn lajang na matu mung grau grau yak hkak wa ai re sha n-ga Mungkan Bawm Jasan hpung ni mung Myen Mungdan kata de shang ahkang n jaw da ai re hpe mung chye lu ai.

Mungkan shinggyim nau na garum hpung ni kawn gaw hkam bawm jai lang ai lam ni hpe jahkring nna bawm jasan ai lam n galaw yang gasat gala majan zim mat tim mung masha si hkala hkrum ai lam gaw matut manoi byin nga na re nga nna tsun sadi jaw da ai re hpe mung chye lu ai.

Shiga – Pyilan U