Shaning 4 Ning Jan Laman Mung Masha Dum Nta Sen Mi Jan Wan Hkru Hten Za Mat Ai Lam

Pajau Media

26 February 2026

Myen hpyen dap mungdan daru magam zing ai 4 ning jan laman wan nat jahten ai majaw mung masha dum nta (119, 411) hten za mat ai lam Data For Myanmar kawn n dau da ai re hpe chye lu ai.

Myen hpyen dap n pu uhpung uhpawng ni a wan nat jahten ai majaw wan hkru ai dum nta (115,568) nga ai lam, Myen mungdan kata wan nat jahten ai hta tsa lam shadang 65 % mungdan ting hta law dik madang gaw Sagaing ginra hta re lam chye lu ai.

Myen hpyen dap uphkang ai 4 ning jan laman Myen hpyen dap hte rawt malan hpung ni lapran gasat gala majan grau laja wa ai rai nna mung masha dum nta wan nat ai lam, manu dan arung arai ni hpe mya la ai lam, mung masha dum nta hkan shara la dap jung ai lam ni myen hpyen dap galaw ai re hpe chye lu ai.

Wan nat hkrum ai majaw 2021 ning hta mung masha dum nta (2111) , 2022 ning hta (46,856) , 2023 ning hta (31,728) hte 2025ning August shata du hkra( 6,800) wan nat jahten hkrum sai lam chye lu ai.

Shiga – Htu Seng