Myitkyina Nbunglipa Makau Kaw Nbungli Pa Htim Gasat Hkrum Ai Hpe Ninghkap N-Gun Madun Ai Lam

Pajau Media

February 27, 2026

Jinghpaw Mung Myitkyina n bungli pa kaw si hkam drone wa gap gasat ai a ntsa ninghkap n ra sharawng ai lam Myen Hpyen Dap madi shadaw ai hpung ni kawn n-gun madun ai lam nga ai re hpe chye lu ai.

Myen Hpyen Dap madi shadaw marai (30) daram gaw February 27 ya jahpawt daw hta Myitkyina nbungli pa makau kaw pyen dau ni lang nna n-gun madun ninghkap lamang ni galaw nga ma ai re.

“Mung shawa hpe masat shingte tawn htim gasat ai lam hpe ninghkap ai lam, mung shawa a asak hpe n gawn ai sha FPV si hkam drone hte Myitkyina nbungli pa hpe htim gasat ai a ntsa ninghkap ai lam, gumshem lai ladat hte kasu kabrawng ai hpung hpe n ra sharawng ai lam, mung masha hpe lam amyu myu hku nna dingsa ai uhpung hpe n ra sharawng ai ” ngu ka da ai pyen dau ni hpai nna n-gun madun nga ma ai re.

Dai lam hte seng nna Myitkyina ginra masha langai tsun ai hta “shanhte gaw asuya masha ni hpe sha nsa n mai hku nna galaw shangun ai re da, ginra masha majing ni nlawm ai, chye pyi n chye ai, line ntsa kaw lung wa yang she chye ai” nga nna tsun ai re.

Dai sha n-ga nbungli pa sa lam hpe mung Myen Hpyen Dap ni shimlam ja ja la da ai re hte lai wa lai sa ni hpe hkap jahkring jep joi ai lam ni galaw nga ai re hpe mung chye lu ai.

Myitkyina nbungli pa kaw lai wa sai February 12 ya shani kalang FPV si hkam drone htim gasat hkrum ai rai nna February 20 ya shani hta mung kalang bai dingsa gasat hkrum ai re.

Dai lam hte seng nna KIA maga kawn gaw shanhte nre lam tsun ningdang da ai rai nna mung masa maram masam ai salang ni tsun ai hta KIA hpe mung masha myit shut hkra Myen Hpyen Dap shanhte nan galaw ai lam re nga nna tsun dinglun nga ma ai re hpe mung chye lu ai.

Shiga – Zau