Myitkyina Muklum Hta Da Ginsup Dabang Ni Gashun Gashe Hpaw Wa Ai Lam

Pajau Media

January 21, 2026

Jinghpaw Mung Myitkyina muklum shinggan shara hkan sha n-ga muklum kata hkan du hkra da ginsup dabang ni gashun gashe hpaw wa ai lam ginra masha ni tsun ai kaw na chye lu ai.

Myitkyina Muklum Aye Zedi Lawk, Dap Kawng Lawk sha n-ga Kaga Lawk ni hkan htwi Hkat shingjawng poi zawn re ni, ga baw amyu myu dat nna hpai da da ai lam hte nga gap game ni sha n-ga Da ginsup shara 50 jan hpaw nga ai lam chye lu ai.

“Lagut damya, mazut roi rip ai manghkang ni byin law ai gaw madung Da Ginsup Dabang ni a majaw re” nga nna ginra masha ni tsun nga ma ai re.

Ya na zawn Da Ginsup Dabang ni law wa ai majaw Myitkyina muklum kata shimlam n nga wa ai sha n-ga amyu shayi ni hpe mazut roi rip manghkang law wa ai sha n-ga lagut damya manghkang ni grau grau law wa ai majaw hkawm sa hkawm wa grai sadi maja ra ai re.

Muklum shinggan hkan sha n-ga muklum kata hkan du hkra Da Dabang ni hpaw wa ai hpe seng ang ai asuya de sawk shawn ai lam galaw ai raitim lit la hparan ai lam n nga ai re hpe mung chye lu ai.

Shiga – Hpring