မြစ်ကြီးနား ရမ်ပူရပ်ကွက်မှ နေအိမ်(၉)လုံး မီးလောင်ပျက်စီး

ပါဂျောင်မီဒီယာ

၂၆ရက်၊နိုဝင်ဘာလ၊၂၀၂၅။

ကချင်ပြည်နယ်၊ မြစ်ကြီးနားမြို့ ရမ်ပူရပ်ကွက်၊ နယ်မြေ(၁၄)တွင် ယနေ့နိုဝင်ဘာ၂၆ရက် နံနက်၉ နာရီကျော်လောက်က နေအိမ်(၉) လုံး မီးကူးစက်လောင်ကျွမ်း ပျက်စီးခဲ့ရကြောင်း သိရသည်။

နေအိမ်(၉)လုံးစလုံးမှာ ခြံတစ်ခြံထဲတွင် ဆောက်ထားသော အိမ်များဖြစ်သောကြောင့် မီးကူးစက်ရန်လွယ်ကူပြီး တစ်အိမ်ပြီးတစ်အိမ် ကူးစက်ကာ နေအိမ် (၉)လုံးထိ လောင်ကျွမ်းပြာကျခဲ့ခြင်းဖြစ်ကြောင်း သိရသည်။

“ အစတော့ အမိုက်ရှို့တယ်ပဲထင်နေတာ၊ မီးကတော့ မီးသတ်ကားတွေလာပြီး ငြိမ်းလိုက်ပါပြီ” ဟု ရမ်ပူရပ်ကွက်နေ အမျိုးသားတစ်ဦး ပြောပြသည်။

မီးလောင်မှုကို မီးသတ်ကားများဖြင့် ငြိမ်းသတ်နိုင်ခဲ့သော်လည်း မည်သည့်အကြောင်းကြောင့် မီးစတင် လောင်ကျွမ်းရသည်ကိုတော့ မသိရှိရသေးကြောင်း သိရသည်။

မြစ်ကြီးနားမြို့တွင် ပြီးခဲ့သည့် စက်တင်ဘာလတွင်လည်း ဂတ်စ်အိုး အသုံးပြုမှုတို့ကြောင့် ကြက်ခြံမီးလောင်ခဲ့သည့် ဖြစ်စဥ်များ ရှိခဲ့သည်။

သတင်း - ဇော်