မြို့လယ်ခေါင်ရှိ ရွှေဆိုင် နေ့ခင်းဘက် ဓားမြ၀င်တိုက်ခံရ

ပါဂျောင်မီဒီယာ

၉ရက်၊ စက်တင်ဘာ၊ ၂၀၂၅။

မြစ်ကြီးနားမြို့လယ်ခေါင် အောင်နန်းရပ်ကွက်ရှိ ရွှေဆန်းလီရွှေဆိုင်ကို ယမန်နေ့ ညနေ ၄ နာရီအချိန်ခန့်တွင် ဆိုင်ကယ်ဦးထုပ်ဆောင်းထားပြီး ​သေနတ်ကိုင်ထားသည့် အမျိုးသားသုံးဦးက ဓားမြဝင်တိုက်သွားကြောင်း ဒေသခံများပြောပြချက်အရ သိရသည်။

ထိုအမျိုးသားသုံးဦးမှာ ရွှေဆိုင်ထဲဝင်လာပြီး ဆိုင်ထဲရှိသူ​များကို ​သေနတ်နှင့်ချိန်ကာ ဆိုင်ထဲရှိသော လက်ဝတ်ရတနာနှင့် အဖိုးတန်ပစ္စည်းများကို ဓားမြတိုက် ဝင်ယူသွားကြောင်း သိရသည်။

ရွှေဆန်းလီ ရွှေဆိုင်သည် စိန်ရွှေရတနာအရောင်းဆိုင်နှင့် အမိန့်ရအပေါင်ဆိုင် တစ်ဆိုင်ဖြစ်သည့်အတွက် ဓားမြတိုက်ခံရမှုဖြစ်စဥ်အတွက် ဆုံးရှုံးမှုကိုအသေးစိတ်မသိရှိရသေးပါ။

မြစ်ကြီးနားမြို့တွင် ယခုရက်ပိုင်းရက်ပိုင်း ခိုးမှု၊ လုယက်မှု ၊ဓါးပြတိုက်မှု​များ ဆက်တိုက်ဖြစ်​နေကြောင်းသိရသည်။

မြစ်ကြီးနားမြို့သည် ကချင်ပြည်နယ်၏မြို့တော်ဖြစ်သည့်အပြင် စစ်ကောင်စီသည် မြစ်ကြီးနားမြို့တွင် ရွေးကောက်ပွဲပြုလုပ်ရန်အတွက် ကြိုးပမ်းနေပြီး အရပ်သားပြည်သူများကို ပစ်မှတ်ထားဖမ်းဆီးမှု၊ စစ်သားစုဆောင်းမှုများ ​ပြုလုပ်နေကြောင်း ဒေသခံများပြောဆိုနေကြသည်။

သတင်း - ဖရိန်း

 Video Credit to Owner