2026 Hpaji Ladaw A Matu KSCU Kaw Jawng Shawk Shawn Mai Sai Lam

Pajau Media

October 29, 2025

Kachin State Comprehensive Universit-(KSCU) kaw Hpaji sharin hkam la na Jawngma ni gaw 2026 ning Hpaji ladaw a matu Jawng shawk shawn ai lam mai galaw sai re hte Jawng shawk shawn form hpe November 3 ya kaw nna hkap la hpang nga sai re hpe chye lu ai.

KSCU Dakkasu Jawng hta sharin na Jawngma ni gaw 2020 ning shawng daw hta Myen Mung Tsang 10 awng da ra na, Mungkan madang madi shadaw ai GED, IGCSE lu da ai wa mai shawk ai lam, Kachin Education Department-KED Shang Lawt Jawng lahta tsang awng da ai ni, Basic Education Completion Assessment Lakmat lu da ai wa, Laika Gin Hpan yawng hta yawm htum (C) Grade lu da ra ai lam, KSCU jawng a masat da ai lawng lam hte bung pre ai ni hpe hkap la sa wa na lam tsun da ai re.

KSCU Dakkasu Jawng hpe Laiza Ginra hta hpaw ninghtawn da ai rai nna Myen hpyen dap mungdan daru magam zing madu ai hpang NUG Asuya kawn woi awn ai kata hpaw sharin nga ai Jawng kaba langai re.

KSCU ngu ai kata hta sharin la mai ai ginhpan (6) lawm ai re hte dai ni gaw School of Medical Sciences, School of Nursing Sciences, School of Technology, School of Economics, School of Agriculture, School of Arts And Sciences ni re nna tinang myit lawm ai ginhpan langai ngai hta masat da ai hte maren shawk shawn mai ai lam n dau da ai re hpe chye lu ai.

Shiga - Pyilan U