Ake Mare Kaw Lak Nak Kaba Pala A Majaw Mung Shawa Dum Nta Langai Wan Hkru Mat Ai Hte Amyu Shayi Lahkawng Lak Nak Kaba Hkra Hkala

Pajau Media Channel

28th March, 2024

Myitkyina Ginwang, Mayan Ginwang daw, Mali Ninghtawn kata, Ake mare hta dap jung nga ai Ake myen hpyen dap post hpe KIA ni March 28 ya jahpawt hkying 5:00 AM aten daram kaw nna sa htim gasat ai hta mare kata lak nak kaba hkrat nna mung shawa nta langai wan hkru mat nna mung masha lahkawng hkala hkrum ai lam chye lu ai.

“Dai ni hkying (12:00) aten daram hta re nga, anhte nta makau na makau kaw lak nak kaba si n ta kata kaw nan wa hkrat ai. Kawa nta sha re majaw hpa nan n ngam sai yawng hkru lawm mat ai. Mam dum lahkawng mung lawm ai, makau na nta mung loi baw mat ai” nga nna amyu shayi langai tsun ai.

Mung masha dum nta kaw wa hkrat bun ai lak nak gaw 60 mm ngu maram lu ai hte Ake mare lawk-1 kaw shingnu nga ai Jan Mahkawng Nang Bu asak (60) jan lagaw kaw hkra nna n tsang ra ai raitim Daw Khin Tan asak (42) gaw kan kaw hkra hkala sawng ai majaw Myitkyina tsi rung kaba de sa bang da ai lam matut chye lu ai.

“Wan hkru hkrum ai nta de wan sat garum na matu hka ja garum ai hpaw mi langai mung kan kaw lak nak hkyap hkra hkala nna sai ladu lai hkaw ai, dai majaw shi hpe Myitkyina tsi rung de shalai dat sai, langai hpe gaw makau na tsi gawk kaw sa madun ai” nga nna matut tsun dan ai re.

Dai hpawt daw kaw nna KIA Dap (11) hpung ni hte Ake Jawng Kawng kaw dap jung ai Myen hpyen dap lapran gasat gala majan hkying hkum mi daram na hkra byin ai re. Lahkawng maga lak nak kaji kaba gap bang bun ai hta ake mare kaw mali lang wa hkrat ai hte lahkawng lang ngu na lang hta mung shawa dum nta wan hkru ai hte mung masha hkala hkrum ai re lam ginra masha ni tsun ai.

Ake mare hta lai wa sai March 10 ya kaw nna Myen hpyen dap ni dap shara jahkrat nna nga wa ai re hte dai hpyen hpung ni hpe March 13 ya shani hta mung KIA pawng hpawng hpung ni htu shadut gap gasat nna gasat poi byin ai re hpe mung chye lu ai.