Hpakant Ginra Hta Sindan Pa Hkying Lam Myen Hpyen Dap Pati (USDP) Awng Dang Ai Lam

Pajau Media

28 January 2026

Jinghpaw Mung Hpakant ginra hta galaw ai ra lata poi daw 3 hta ra lata sindan pa bang ai masha grai yawm ai raitim sindan pa 1,000 jan hte ကြံ့ခိုင်ရေးပါတီ (USDP) awng dang ai lam Myen Hpyen Dap n dau da ai re hpe chye lu ai.

Lai wa sai Januray 25 ya shani Hpakant ginra ra lata poi galaw nga ai aten lahkawng maga gap gasat ai lam byin nga ai raitim sindan pa wa bang ai masha 3,000 jan nga ai lam ra lata poi commision n dau da ai re.

Hpakant ginra hta ra lata poi daw 3 hpe galaw ai hta mare kahtawng ni hkan sindan pa bang shara yawng 19 galaw da ai re hpe mung chye lu ai.

Myen Hpyen Dap gaw ra lata poi n du shi ai aten laman kaw nna Hpakant ginra hta shimlam la ai lam galaw ai raitim lahkawng maga gap gasat hkat ai masa a majaw gasat gala majan byin ai rai nna sindan pa wa bang ai masha grai yawm ai re lam chye lu ai.

Myen Hpyen Dap gaw Hpakant ginra hpe bai uphkang lu na matu lai wa sai 2025 May shata daram kaw nna ga lam hku htu shadut htim gasat nga ai re sha n-ga n bungli bawm jahkrat gasat ai lam matut manoi galaw nga ai re hpe mung chye lu ai.

Shiga- Hpring