Myen Hpyen Dap Gaw Gasat Gala Majan N Nga Tim Sagaing Ginra Hta N bungli Bawm Jahkrat Bun Ai Lam

Pajau Media

January 28, 2026

Myen Mungdan kata Myen Hpyen Dap gaw shani shagu gasat gala n nga tim n bungli bawm htim gasat ai lam laja lana galaw nga ai hta Myen Mungdan madang hku shing daw yang Sagaing ginra gaw n bungli bawm htim gasat shadang law dik re lam ginra shiga ni kaw na chye lu ai.

Sagaing ginra kata 2025 December shata kaw nna 2026 January 27 ya du hkra shata lahkawng laman Myen Hpyen Dap a n bungli bawm htim gasat ai majaw asak si sum ai ginra masha marai 32 daram nga sai hte marai 50 hkawt hkala hkrum ai lam nga sai re hpe chye lu ai.

Wetlet Information Network kawn tang madun da ai hta lai wa sai December shata laman hpyen koi yen mung masha ni shanu nga ai mare kahtawng ni hkan n bungli bawm jahkrat ai lam 14 lang nga ai hta mung masha marai 26 asak si sum nna marai 40 hkawt hkala hkrum sai lam tang madun da ai re.

January shata laman hta mung Sagaing ginra kata shani shagu ngu na drone bawm sha n-ga n-gun kaba ai nbungli bawm ni matut manoi jahkrat bun ai majaw mung masha si hkala ai lam shani shagu byin nga ai re hpe chye lu ai.

Lai wa sai 2025 shaning hta mung Myen Mungdan kata Myen Hpyen Dap n bungli htim gasat ai lam 1,180 lang galaw ai hta Sagaing ginra kaw 263 lang hte htim gasat lam law dik re lam chye lu ai.

Dai sha n-ga n bungli htim gasat ai majaw asak si sum ai mung masha mung Sagaing ginra kata marai (504) nga nna hkala hkrum ai masha marai ( 774 )nga sai lam Myen Mungdan hpyen masa hte shimlam masa hpe yu maram nga ai Hpung (Myanmar Military and Security Studies Institute (MDSI) a laning mi na sum tang kaw na chye lu ai.

Ya na zawn mung masha hpe masing nga nga hte htim gasat nga ai Myen Hpyen Dap woi awn nna galaw ai Ra lata poi kaw nna lung wa ai asuya gara uhpung uhpawng hpe mung mungkan mungdan kawn tsep kawp madi shadaw ai lam n galaw na matu Justic for Myanmar kawn January 26 ya shani hpyi shawn ai lam n dau da ai re hpe mung chye lu ai.

Shiga- Pyilan U