Alen Bum Jawng Kaw Na Jawngma Marai (40) Jan A Matu Jawng Lang Laika Hte Bu Hpun Palawng Ni Hkyak Hkyak Ra Kadawn Nga Ai Lam

Pajau Media

August 28, 2025

August shata hta sha Laiza ginjaw ginra kata sawng dik ai Hka Mawru lahkawng lang hkrum sha lai wa sai re hte Hka mawru hta Dum nta nawng nawng yawng lawm mat ai masa lam ni a majaw ya aten Jawng lung nga ai Ma marai (40) jan a matu laika, jawng lang arung arai hte bu hpun palawng kaw na hkawt hkyak hkyak ra kadawn nga ai lam chye lu ai.

Dai jawng ma marai (40) jan gaw Alen bum lahta tsang jawng kaw jawng lung nga ma ai re hte Hka Mawru sawng dik madang hkrum sha ai Je Yang, Hpun Lum Yang, Hpung Mai Yang, Sut Mu Awng hpyen koi yen dabang kaw na Ma ni re hpe mung chye lu ai. Hka Mawru a majaw hten za mat ai Alen bum jawng Tsi jaw gawk hpe mung grai n lu gram sharai la shi ai re lam mung chye lu ai.

Hka mawru a majaw hkrun lam ni grai hten za mat nna Jawng hpe gan pat da ai raitim ya aten shawoi na zawn sha bai hpaw sharin nga sai re. Laiza ginra hta Hka mawru hkrum sha ai ginra ni hkan jasan jaseng ai daw hpe gaw ngut kre sai madang ngu mai tsun ai raitim Gaw sharawt matsing ni mung galaw nga dingyang re hpe mung chye lu ai.

Hka mawru byin ai hpang Laiza ginra kata Myi Hprap Wan shadaw ni mung hten za mat ai sha n-ga Wan jak hka len la ai shakum ni gyi mat ai majaw shata mi hkawt myi hprap wan n lu mat ai raitim August 25 ya kaw nna Myi Hprap Wan shawoi na zawn bai lu sai lam mung chye lu ai.

August shata laman byin lai wa sai Laiza ginra Hka Mawru hta Mung masha marai (6) asak si sum nna, dum nta (460) hte mahkrai (7) hten za mat ai lam nga sai re hpe mung chye lu ai.

Shiga – Pyilan U