Putao Machyang Baw Ginra Maga De Hpyen Masa Grai Shaja Nga Ai Hte Gasat Gala Majan Byin Ai Lam

Pajoung Media

January 23, 2026

Jinghpaw Mung, Putao-Machyang Baw maga de Myen Hpyen Dap gaw hpyen n-gun kaba hte htu shadut ai sha n-ga hpyen laknak arung arai ni grai jahting wa ai majaw aten n tam gasat gala mai byin wa ai majaw ginra masha ni grai sadi nna hkawm sa ra ai lam rawt malan hpung ni tsun sadi jaw da ai re hpe mung chye lu ai.

Myen Hpyen Dap gaw lai wa sai January 15 ya hpang daw kaw nna Putao HK.L.Y 46 dap de n bungli hte malu masha arung arai ni matut manoi htaw shalai nga ai sha n-ga matut manoi hpyen mawdaw ni hte Machyang Baw maga de bai htaw lahka nga ai lam chye lu ai.

“Putao Hk.L.Y 46 Dap kaw nna n bungli hte htaw ai, dai kaw na matut nna Machyang Baw maga de Mawdaw ni hte bai htaw shalai nga ai re” nga nna ginra masha langai tsun ai re.

Myen Hpyen Dap gaw Machyang Baw Htang Ga mare maga de lagaw lam hpyen shamu ai sha n-ga N hka Ga Maga de mung hka lam hku hpyen shamu shamwat ai lam ni nga wa ai lam chye lu ai.

Myen hpyen dap gaw Jinghpaw Mung kata lagaw lam hku hpyen shamu ai lam matut manoi galaw wa ai sha n-ga n bungli bawm dingsa gasat ai lam matut manoi galaw wa ai re hpe mung chye lu ai.

Shiga – Hpring