KIA Uphkang Ai Ginra Kata Kani-Nang Hpam Pat Jasan Ai Lam Ja Ja Ahkyak La Galaw Nga Ai Lam

Pajau Media

January 23, 2026

Jinghpaw Mung kata KIA pawng hpawm hpung ni htim gasat zing madu da lu sai ginra ni hkan KIO uphkang masa hkrang shapraw galaw nga ai hta Wunpawng Amyu sha ni a hpyen madung Ka-ni nanghpam PJS ai magam bungli hpe mung ja ja ahkyak la nna galaw nga ai lam chye lu ai.

Shanglawt uphkang ginra ni hkan Ka-ni nanghpam PJS ai lam hpe ginra masha langai tsun ai hta “ya gaw shanglawt gate shagu kaw Ka-ni jep ai, lai wa lai sa ni hpe shanhte yu maram nna n tsen ai ni hpe gaw n hpye hkan du hkra ahkrawk jep ai, mu ai hte gaw rim ahkyak la ai, ya hte anhte wa ai shaloi mung Nang Zaw shagyit kaw grai jep taw ai” nga nna lai wa lai sa galaw ai mung masha langai tsun dan ai re.

KIO uphkang ginra tai nga sai Pangwa ginra hta mung Shanglawt Asuya kawn woi awn ai hte ginra kata Ka-ni nanghpam ningmu jahpaw hkaw tsun ai hpawng ni dingyang galaw nga ai majaw dai ginra hta mung Ka-ni nanghpam hkai shadut lu sha ai lam grai hkoi tsai wa sai re hpe mung chye lu ai.

Lai wa sai ten hkan gaw KIO Ka-ni nanghpam PJS Komiti ni woi awn ai kata makam masham nawku hpung ni hte gindun nna PJS hpung hpaw nna Ka-ni nanghpam gasat shamyit ai magam bungli hpe n-gun dat galaw lai wa sai re .

Raitim Myen Hpyen Dap mungdan daru magam zing madu ai hpang kaw nna PJS magam bungli hpe lai wa sai ten na zawn nmai galaw mat ai majaw ya aten Myen Hpyen Dap uphkang ai Myitkyina ginra sha n-ga muklum kaba ni hkan Ka-ni nanghpam hpe wang lu wang lang jai lang ai masha grau grau law wa ai re hpe mung chye lu ai.

Ka-ni lu sha dut hpaga galaw ai lam hpe lit nga ai asuya kawn mung ahkyak la ai lam n nga ai majaw ya aten Ka-ni lu sha masha ni grau grau law jat wa ai hte lagut damya manghkang ni mung shani shagu ngu na hkrum sha nga ma ai re hpe mung chye lu ai.

Shiga- Pyilan U