ang Hpare Myen Hpyen Dap Shagyit Kaw Putao Ginra Masha Hta Lai Nna Hkawm Sa Masha Ni Hpe N Shalai Ai Lam

Pajau Media

1 July, 2025

Myen hpyen dap gaw Myitkyina pru Shang hkawm sa hkrun lam ni hta hkrun lam hkawm masha ni hpe laja lana jep joi ai hte myitkyina Putao hkrun lam Tang Hpare Myen hpyen dap shagyit kaw mung Putao ginra masha ni hta lai nna kaga hkrun lam hkawm masha ni hpe n shalai ai lam hkrun lam hkawm ginra masha langai tsun ai.

“ N dai laman Tang Hpare Myen hpyen dap shagyit kaw gaw grai jep ai, Putao, sumpra bum, N jang Yang Mung chying masat lang ai ni hpe sha shalai ai, kaga ginra hkan na ni hpe n shalai ai, Yu wa maga mai tim bai lung wa maga n mai sai, ginra masha n kau hpe shalai tim pyi grai jep ai, atsin ayang she re, marai langai jep ngut yang langai kaw bai htawt rai nna jep ai, N jang yang maga de Jawng sa lung na Jawng ma ni hpe mung n lung wa shangun ai dai shagyit hte kaw grai yak ai ga re” nga nna N jang Yang de na yu wa ai hkrun lam hkawm masha langai tsun dan ai.

Myen hpyen dap gaw Jinghpaw Mung ginra kata lam amyu myu hku nna gumhpraw hta sha, masha rim ai lam ni hpe galaw nga ai re hte grau nna gaw shahte shara la da ai shagyit ni hkan lai wa lai sa mawdaw ni, Mung masha ni hpe jep joi, rim ai lam, gumhpraw hta sha ai lam grau galaw wa ai majaw ya aten hkrun lam hkawm mung masha ni grau yak hkak nga ai re lam mung chye lu ai.

Myitkyina pru shang ginra rai nga ai Deng 21 shagyit kaw mung Mung chying masat laja lana jep joi nga ai sha n-ga Mung chying masat n lawm ai hkrun lam hkawm masha ni gaw Mare uphkang salang ni a madi shadaw laika ni hte hkawm sa ra ai re. Madi shadaw laika ni hte hkawm sa tim pyi Ga Baw amyu myu shadut rim nna gumhpraw hte bai shaw la shangun ai lam ni nga ai lam mung chye lu ai.

Myen hpyen dap pawng hpawm P.T.Ts ni gaw Myo mare kaba hkawm sa hkrun lam lapran shagyit dung nna gumhpraw ladu lai hta sha ai majaw Jinghpaw Mung kata hkrun lam hkawm manu ni lani hte lani manu rawt wa ai re nga nna ginra masha ni tsun ai kaw na chye lu ai.

Shiga – Pyilan U