April Praw (1) Ya Kaw Na May (16) Ya Du Hkra Shata Mi Jan Laman Hta Mungdan Ting Hta Myen Hpyen Dap Ni A Laknak Kaba Gap Shadam Bum Ai A Majaw Si Sum Ai Jahpan

Pajau Media

19 May 2025

April praw (1) ya kaw na May (16) ya du hkra shata mi jan laman hta mungdan ting hta Myen hpyen dap ni a laknak kaba gap shadam bum ai a majaw amyu shayi marai (10) hte shadang sha marai (14) yawng pawng marai (24) asak si sum ai lam mung masa bawng masha ni hpe garum ningtum jaw ai hpung (AAPP) kaw na ndau da ai re.

Asak si sum mat ai hta asak (18) ning npu Ma marai (4) lawm nna Sagaing Ginwang hte Magway Ginwang ni hta marai (6) hpra si ai hte law dik ai shara re lam chye lu ai.

May (14) ya shani hta mung Sagaing, Yinma Pyin Ginra Yekyi Pyin mare kaw Myen hpyen dap ni a laknak kaba hte gap shadam bum ai a majaw dum nta langai a ntsa wa hkrat kapaw nna tsang-12 jawng ma langai hkra hkala si sum mat ai re.

January praw (1) kaw na May praw (9) ya du hkra Myen hpyen dap a majaw mungdan ting kaw nga ai amyu shayi marai (222) si sum ai sha n-ga asak (18) ning npu na Ma ni marai (38) ting lawm ai lam chye lu ai.

Shiga – Htu Seng