April Shata Laman Jinghpaw Mung Kata Gasat Gala Majan (10) Lang Daram Byin Ai Lam BNI Kawn N Dau

Pajau Media

May 8.2025

Jinghpaw Mung hta 2025 April shata laman KIA pawng hpawm hpung ni hte Myen hpyen dap lapran gasat gala majan 10 lang daram du hkra byin sai rai nna nbungli hte gap gasat manghkang (3) lang daram byin ai lam hpe BNI Myanmar Peace Monitor kawn ndau da ai re.

Jinghpaw Mung kata gasat gala majan (10) lang byin ai hta Manmaw ginra, Hpakant ginra ni hta byin ai rai nna gasat gala majan a majaw Mung masha asak si sum ai marai (3), hkala hkrum ai masha marai (4) nga nna Mung masha (1,000) hkawt hpyen koi yen ra sai re.

Myen mungdan madang hku rai yang gasat gala majan (90) lang daram byin nna, nbungli bawm gasat ai lam (110) daram hte Mung masha (79,222) hpyen koi yen nna marai (208) gaw asak si sum ai rai nna hkala hkrum ai gaw marai (331) nga ai re hpe mung chye lu ai.

Matut nna Manmaw ginra hta mung gasat gala majan dai ni du hkra laja nga dingyang rai nna Manmaw ginra kata naw ngam nga ai Ts.K.Hk (21) Dap hte, Hk.L.Y (47) Dap ni hpe zing madu lu na matu KIA maga kawn mung htim gasat nga ai re. Ya aten Manmaw ginra kata na Myen hpyen dap shara law malawng hpe KIA pawng hpawm hpung ni zing madu la lu sai re hpe mung chye lu ai.

Dai sha n-ga Hpakant ginra, Myitkyina Hpakant sa lam ntsa na Nam Ya, Kap Maw Zup ginra mayan hta hpyen masa grai shaja hkat nga ai re hte shani shagu gasat gala byin nga dingyang re. Gasat gala majan hta Myen hpyen dap gaw nbungli bawm, drone ni hte laja lana gap gasat nga ai re hpe mung chye lu ai.

Shiga- Htu Seng