Da Ginsup Dabang Ni Hpaw Nna Garu Ai Majaw Dai Lawk Hkan Shanu Nga Ai Mung Masha Ni A Matu Dingbai Dingna Byin Ai Lam

Pajau Media

January 26, 2026

Jinghpaw mung Myitkyina muklum Setmu Zone lawk kaw nga ai Da ginsup dabang ni gaw shana tup nhtoi hkren hkren garu ai majaw dai lawk kaw shanu nga ai mung masha ni a matu dingbai dingna byin ai lam lawk masha ni tsun nga ma ai re.

Myitkyina muklum gaw shana hkying 10 kaw nna jahpawt daw hkying 4 du hkra shana pru hkawm n mai ai lam n dau da ai raitim shana hkying 8 kaw nna jahpawt daw hkying 3 du hkra Da ginsup dabang ni, ka manawt poi lamang ni garu kaji rai galaw ai majaw yup nlu ai lam lawk nga salang langai tsun ai re.

“N dai laman 4 ya daram rai wa sai, shana hkying 8 kaw nna jahpawt hkying 3 daram du hkra mahkawn mung hpaw, grai garu ai, yup n mai ai, hpa majaw re kun n chye, makam masham hte seng ai hpawng ni re kun, Hpa laika mung n shakap da ai” nga nna tsun ai re.

22 ya kaw nna hpaw hpang ai rai nna Da ginsup ai dabang kata kaw Nga Man, Chyauk Kawng Jin, Hpaida da ai lam hte kaga ginsup hpan ni law law hpaw nga ai re lam chye lu ai.

“Ka manawt ai stage show hte Da Ginsup dabang ni hpe garan da ai rai nna stage show maga de gaw masha nau n law ai, Da ginsup ai maga de gaw masha grai law ai, grau nna gaw ramma ni le, shanhte gaw Da Ginsup ai lam hpe madung galaw mayu ai sam ai, aten na na hpaw gaw n mai na re” nga nna tsun ai re.

Myitkyina muklum kaw mi kaw nna Da ginsup dabang ni hte lagut damya mya ai lam ni grai sawng nga ai re hte Da ginsup dabang ni bai hpaw jat ai majaw ginra masa gaw grau grau sawng wa na hpe myit tsang nga ma ai re hpe mung chye lu ai.

Lai wa sai January 14 ya shana hta mung Dap kawng lawk kaw hpaw da ai Sun City Da ginsup dabang hpe balik hpung ni hte shimlam hpung ni shang rim kau ai lam nga sai re hpe mung chye lu ai.

Shiga – Zaw