August Shata Laman Laknak Kaba A Majaw Mung Masha Marai 14 Asak Si Sum N Na Marai 53 Hkala Hkrum Ai Lam

Pajau Media

September 2.2025

Jinghpaw Mung kata August praw 1 kaw nna 31 du hkra Laknak kaba a majaw asak si sum ai marai 14 nga nna marai 53 hkala hkrum ai lam KHRW kawn n dau da ai re.

August praw kaw nna 15 ya laman Mung masha marai 45 gaw Laknak kaba hkra hkala nna marai 9 asak si sum ai rai nna August 16 ya kaw nna 31 du hkra Mung masha marai 8 hkala nna marai 5 gaw asak si sum lai wa sai lam chye lu ai.

Myen hpyen dap a Laknak kaba gap ai gaw Mung masha dum n ta, mare lawk hkawm sa lam hkan wa hkrat ai lam, dai sha n-ga Drone bawm jahkrat bun ai hta Asak kaji ai ma ni asak si sum ai lam dai hta Jawng naw lung nga ai ma ni lawm ai lam chye lu ai.

KHRW kawn gaw ya na zawn Mung masha hpe masat shingte tawn gasat ai lam, Myen hpyen dap a shinggyim ahkaw ahkang tawt lai ai lam, Myen hpyen dap galaw ai lam hpe garum madi shadaw ai wuhpung wuhpawng ni hpe UN hte mungkan shinggyim ahkaw ahkang hte seng ai hpung ni kawn ahkyak la ai lam galaw na matu hpyi shawn ai re.

Dai sha n-ga shinggyim nau na garum shingtau lam, hkala hkrum ai ni, Ma kaji ni, amyu shayi ni, hpyen koi yen Mung masha ni hpe myit masa hte seng ai lam, hkamja lam hte kaga ra kadawn nga ai lam ni hpe garum madi shadaw na matu mung matut hpyi shawn da ai re.

Myen hpyen dap gaw myen mungdan ting ra lata poi galaw na matu hkyen shajin nga ai aten Mung masha hpe masat shingte tawn nna Laknak kaba hkrup mara gap bun ai lam ni grau grau galaw nga ai re.

shiga - Htu Seng