Awng Mye (2) Ginra Hta Chyat Rawng Nga Ai Mung Masha Ni Machyi Makaw Byin Ai Masha Gaw Law Tsi Mawan N Lu Grai Yak Hkak Ai Lam

Pajau Media Channel

11st March, 2024

Majan lapran chyat rawng nga ai hpyen yen mung masha ni hta machyi makaw byin ai masha law nga ai re hte ya aten tsi mawan n nga yak hkak nga ai re lam hpyen koi yen mung masha ni tsun ai re.

Ya Aten Awng Mye (2) hpung gyi Jawng kaw marai (600) daram naw chyat rawng nga ai re hte ya aten asak kaba ai gumgai dingla ni, ma kaji ni, ma hkum kanu ni machyi makaw byin law nga ai re. Mare kaw na tsi mawan loi li lu ai ni nta de wa la na ahkang pyi nlu grai yak hkak ai nga nna hpyen koi yen ai amyu shayi langai tsun dan ai re. Majan lapran chyat rawng nga ai hpyen koi yen mung masha ni hpe shaw la na matu KBC Bawng Ring Magam Dap, Sama Ginwang, Waimaw ginwang magam gun ni kawn woi shakut nga ai hta marai (600) daram hpe lu shaw la sai re hte chyat rawng nga ai mung masha ni a masa hpe koi yen mung masha langai tsun ai.

“Ya aten du hkra sanat kaba ni mung gap nga dingyang re, Awng Mye (2) mare ka-ang na hpung gyi jawng kaw yawng majaw nga ga ai, Waw waw ai gaw yawng ngu na daram rai wa sai, hkum lawt daw sha hprawng wa ai re, gumgai dingla, ma kaji ni machyi makaw law wa ai, mare kaw na ma shangai garum tsi sara ni mung lawm ai, nta kaw ngam kau da ai tsi mawan wa la na ngu tim ahkang n jaw rai nna machyi makaw byin tim tsi mawan n nga grai yak hkak ai”.

Hpyen yen ni hpe wa tau la na nga shiga gaw na ai, raitim ya aten du hkra n du wa ai, lawm wa ai malu masha ni mung hpawt ni din hkan nga yang ma mat sai, nga ai daram hpe sha sharam let sha nga ra ai masa re lam, matut tsun dan ai re.

“Lu sha gaw n ta kaw n-gu ni loi li la sa ai dai jawm sha nga ga ai, hpawt ni hkan gaw sha na pyi n nga, yak wa na masa byin nga sai, yup na shara ni mung grai yak ai, n kau gaw ga hkan yup ai re majaw hkum ni ali ahti rai hkum chyen mi si mayu ai zawn nga byin ai masha law ai re”.

Chyat rawng nga ai hpyen yen mung masha ni hpe shaw la na matu nawku makam masham ningbaw ningla ni, PCG ni ta gindun let seng ang ai de tsun jahkrup shakut nga dingyang re lam, tang shawn laika mara ai lam ni galaw ai raitim ya aten du hkra myen hpyen dap maga na nhtang shana wa ai lam n nga shi ai re hpe mung chye lu ai.

Gasat gala majan byin hpang ai March (7) ya kaw nna Myen hpyen dap kawn lak nak kaba hkrup mara gap bang nga ai majaw asak (60) ning lahta re ai dinggai marai (3) lak nak kaba hkyep hkra hkala nna asak si sum ai lam nga ai re hte asak (4) ning re ai ma langai mung baw kaw lak nak hkyep hkra hkala ai lam, asak (12) ning re ai ma kaji langai mung shingma hte lahpa kaw hkra hkala ai lam ni nga ai lam chye lu ai. Ya aten chyat rawng nga ai mung masha ni hta lak nak hkra hkala ai ningma hte re ai ni, machyi makaw, madawn kan mase machyi makaw lam ni law rai nna tsi mawan n nga, pru hkawm ahkang mung nlu grai yak hkak jam jau nga ma ai lam chye lu ai.