Awng Mye (2) Ginra Hta Chyat Rawng Nga Ai Ni Hpe Hkye Shaw La Na Matu Shakut Nga Dingyang Lapran Asak Si Sum Ai Mung Masha Ni Nga Wa Ai Lam

Pajau Media Channel

13th, March,2024

Gasat gala majan a majaw chyat rawng nga ai mung masha ni hpe hkye shaw la na matu nawku makam masham hpung ni hte lit nga salang ni shakut nga dingyang re hte ya aten du hkra gaw n lu shaw la shi ai laman mung masha asak si sum ai lam ni law wa ai re lam chye lu ai.

Awng Mye (2) ginra masha ni gaw mare ka-ang na hpung gyi jawng kaw mai byin ai masa hku matsut rawng nga ra ai bat mi daram rai wa sai re. Malu masha, nga shara yak hkak ai masa lam a majaw asak kaba sai gumgai dingla ni grai nga jam jau ai re hte March (12) ya shana daw hta mung asak (87) ning re ai ah dwi dinggai langai n sa sa n hkru nna asak si sum mat ai re lam nga sai sha n-ga lak nak hkra hkala nna asak si sum ai ni mung nga ai lam Awng Mye (2) ginra hta chyat rawng nga ai ginra masha langai hkyak hkyak byin nga ai masa lam hte seng nna tsun ai hta “Anhte n dai kaw koi yen taw ai gaw lai wa sai March (7) ya kaw na re sai. Ya du hkra n lu pru shi ai. Myen hpyen maga na salang langai tsun ai hta nanhte n dai kaw sha nga ra ai, masum ya ram sha nga shangun na, masum ya laman Awng Mye (1) ginra zang ayai mat hkra gasat kau na nga tsun ai re. Ya gaw n dai kaw chyat rawng nga ai bat mi rai wa sai. Malu masha ni mung ma wa sai. Sa shaw la na masha ni hpe la nga dingyang re” nga nna tsun ai re.

Myen hpyen dap kawn mung shawa hpe ninggang shatai nna woi shachyat nga ai masa re. Chyat rawng nga ai mung masha ni hta machyi makaw hkrum ai masha law wa ai re hte tsi mawan mung grai yak hkak nga ai re hpe mung chye lu ai. Chyat rawng nga ai mung masha ni hpe hkye shaw la na matu seng ang ai Uhpung Uphawng ni kawn mung shakut nga ai raitim myen hpyen dap kawn pat shingdang nga dingyang re hpe mung chye lu ai.

Majan byin hpang wa ai kaw nna tinang asak lawt daw sha hprawng yen wa ai re hte lu da ai dum nta, Sut gan U, wa Yam nga ni hpe tawn kau da nna hkum lawt daw hprawng hkawm nga ra ai hta lagu lagut manghkang ni mung byin nga ai sha n-ga Lak nak kaba, drone hte bawm jahkrat bun ai lam ni dingyang galaw nga ai re lam ginra masha matut tsun dan ai re. “mare kata rem da ai U wa yam nga ni hpe shat mung nlu jaw, mare kata na gwi ni mung shat n lu sha na wau pyi n kam wau mat sai, grai myit n pyaw hpa re, lagut damya mung law she law, Mungkan hten wa ai zawn she re ” nga nna tsun ai re.

Ya aten Shwe Nyawng Pin ginra mayan Awng Mye (2) ginra masha ni yawng rai yang Mung masha hkying mi jan gaw gasat gala majan n nga ai raitim myen hpyen dap kawn pru hkawm ahkang pat tawn da ai majaw chyat rawng nga dingyang re hte lit nga ai myen hpyen dap salang ni hpe mung lang hte lang hpyi shawn ai raitim ahkang n jaw ai re. ya aten chyat rawng nga ai mung masha ni malu masha, Tsi mawan, bu hpun palawng nba zawn re ai ni grai ra kadawn nga ai re hpe mung chye lu ai.

 Shiga – Bung Shi