Bala Min Htin Mahkrai Kaw Phone Hpe Madung Jep Ai Lam Grau Galaw Wa Ai Lam

Pajau Media

October 31, 2025

Myen hpyen dap gaw Myitkyina Muklum kata Lam braw, Lam maw kaba hkan aten ntam hkap jahkring san jep ai lam grai galaw nga ai hta Myitkyina Waimaw matut da ai Bala Min Htin mahkrai kaba hta ndai laman Phone hpe madung jep joi ai lam grau galaw wa ai nga nna ginra masha ni tsun ai re.

“ Bala Min Htin mahkrai kaw jep ai lam gaw dingyang re, Cycle Mawdaw ni hpe hkap jahkring ai, raitim n dai laman gaw Phone hpe madung jep wa ai, n dai bat laman sha re, Bala Min Htin mahkrai kaw Sama ginwang kata na Hpung Sara Num lahkawng hpe ma rim kau sai, Phone kaw Shanglawt Hkying hte re ai sumla ni mu ai da, hpa tsun mung n mai woi mat sai, hpa shiga mung gaw n na shi ai, hkan gaw hkan na re” nga nna nna rim hkrum ai sara num hte ni nawn ai masha ni tsun dan ai re.

Myen hpyen dap gaw Mung masha ni hkawm sa shamu shamawt tsun shaga ai lam hpe Phone jep joi nna mara tam rim zing ri ai lam ni galaw nga ai re majaw Mung masha ni mung hkawm sa hkawm wa lam ni hta grai sadi maja ra na hte tinang a Phone shimlam hpe tinang lit la ra ai lam, Myen hpyen dap ntsen nhten na zawn re ai lam hpe n mai bang da ai nga nna mung tsun ai re.

Ya na zawn Mung masha hpe jep joi rim ai mabyin gaw Bala Min Htin mahkrai kaw sha law malawng byin ai re. Mahkrai kaw shanhte ntsen ai masha ni hpe hkum hkrang masawp jep ai sha n-ga lam hkawm ai hkrang du hkra jep ai re majaw ya aten hkawm sa hkawm wa lam grai sadi maja ra ai lam ginra masha ni tsun nga ma ai re.

Myen hpyen dap mungdan daru magam zing madu ai aten kaw nna Rawt Malan magam bungli hta shamu shamawt shang lawm ai majaw kalang rim tara jahkrat da hkrum sai ni hpe ya aten du hkra jep joi rim ahkyak la nga ai re.

October shata praw hta mung lai wa sai 2022 shaning hta PDF hpung ni hpe garum madi shadaw ai gumhpraw shalai ai lam galaw nga nna rim na ahkang shapraw da ai amyu shayi hpe October praw laman Bala Min Htin mahkrai kaw jep joi rim woi mat wa ai re hte ya aten du hkra nlu hkan shaw la ai re hpe mung chye lu ai. N dai hpang daw de Kpay gumhpraw pru shang lam ni hpe du hkra jep joi ahkyak la ai lam galaw wa ai re hpe mung chye lu ai.

Shiga – Pyilan U