Bala Min Htin Mahkrai Kaw Rim hkrum Ai Saranum 2 Hpe Bai Dat Ya Sai Lam

Pajau Media

November 5, 2025

Myitkyina hte Waimaw matut da ai Bala Min Htin Mahkrai Kaba hta lai wa lai sa Mung masha ni hpe dingyang hkap jahkring jep joi nga ai re hte October shata htum maga kaw Bala Min Htin mahkrai lai wa ai aten rim hkrum ai Sama Ginwang na Hpung magam gun Saranum yan hpe n dai bat laman sha bai dat ya ai lam chye lu ai.

Ginra masha ni tsun ai hta " Dai saranum yan kaw na langai kaw Shanglawt hkring hte gayet da ai sumla lawm ai majaw rim hkrum ai re, dai hpe PCG ni hte matut mahkai nna jahkrup ai majaw lawt wa sai, gayet da ai sumla kaw Shang Lawt Dazik n lawm ai majaw tsamai sai, Ka manawt ai ten hpun na gayet da ai re ngu tsun di sha lawt ai re " nga nna Ginra masha tsun ai re.

Ya aten na masa hta Myen hpyen dap gaw Bala Min Htin mahkrai kaw sha n-ga Muklum kata shana pru prang hkawm ai ni hpe hkap jahkring san jep, rim woi mat nna Gumhpraw hte bai shaw la shangun ai mabyin ni lang hte lang byin nga ai re majaw Asak ram ai ramma ni grai sadi let hkawm sa ra ai nga nna Myitkyina Ginra Myitsu Salang langai mung tsun hpaji jaw da ai re hpe mung chye lu ai.

Bala Min Htin mahkrai kaba kaw gaw san jep ai lam dingyang galaw nga ai re majaw Myen hpyen dap hte n htan shai ai zawn re ai Sumla ni, matut mahkai galaw da ai Massage zawn re ai tsep kawp n mai ai lam, n dai hpang daw de Bala Min Htin mahkrai kaba gaw myen hpyen dap a matu masha rim shara langai zawn byin nga ai lam ginra masha ni tsun nga ma ai re.

Shiga - Pyilan U