Bat Lahkawng Laman Myen Mungdan Ting Hta Byin Ai Gasat Gala Masa Hpe Tang Madun Ai Lam

Pajau Media Channel

20th March, 2024

Myen mungdan ting hta 2024 February 28 kaw nna March (12) ya du hkra bat lahkawng laman Mung shawa makawp maga hpung (PDF/LDF), Rudi amyu sha rawt malan hpung ni hte Myen hpyen dap lapran gasat gala majan (75) lang byin ai lam Myanmar Peace Monitor kawn tang madun da ai kaw na chye lu ai.

Gasat gala majan law dik gaw jinghpaw mung ginra re hte bat lahkawng laman gasat gala majan (21) lang du hkra nga ai re lam mung chye lu ai.Gasat gala majan lapran Myen hpyen dap a Laknak kaba gap bun ai majaw Mung shawa dum nta hten za, Wan nat jahten hkrum ai lam mung law law nga ai re hte Sagaing, Jinghpaw mung, Tanintaryin , Kayin Mung, Sam mung hte Mandalay ginra hkan na mung masha (37,500) daram mung shimlum ai shara de hprawng koi yen nga ra ai re lam, Jinghpaw mung ginra hta gaw mung masha Mun mi hkawt bai gahtap koi yen ra ai re lam tang madun ai.

Bat lahkawng laman Myen mungdan ting hta byin ai gasat gala majan hta Myen hpyen dap maga na marai (223) asak si sum nna Mung shawa makawp maga hpung (PDF) maga na marai (6) asak si sum ai MPM n dau da ai kaw na chye lu ai.

Myen hpyen dap kawn Laknak kaba hkrup mara gap bun ai majaw sagaing, rahkai mung, Sam Mung, Kayin Mung, Jingpaw Mung, Bago, Tanintaryin, Magwi hte Hkang Mung ginra ni hta Mung masha (61) asak si sum ai nga ai hte Jinghpaw mung ginra hta gaw Myen hpyen la marai (73), Mung masha marai(9) du hkra asak si sum ai tang madun da ai .

Myen hpyen dap uphkang wa ai 2021 Febuary kaw nna 2024 March (12) ya du hkra rai yang myen mungdan ting hta gasat gala majan (4259) lang byin lai wa nna hpyen koi yen mung masha (2,925,529) daram du nga sai lam Myanmar Peace Monitor ni tang madun da ai.