Bat Masum Ya Shani Hta Hkawm Sa Ai Sau Bang Mawdaw Ni Hpe Rim Hpang Nga Sai Lam

Pajau Media

1 April 2026

Sau shayawm lang na matu bat shagu na bat hpang masum ya shagu sau bang lang ai mawdaw, cycle ni shinggan nle na matu hte rung bungli galaw ai masha ni tinang nta kaw na sha bungli galaw na hpe hpyen dap kawn ndau da ai hpang dai ni Myitkyina muklum kata hta hkawm sa nga ai sau bang mawdaw cycle ni hpe rim hpang taw sai re hpe chye lu ai.

Wanleng daru shawng hkan, KBZ bank makau hkan sinat lang ai balik, hpyen la ni gaw mawdaw hte sin yu nna rim nga ai hpe chye lu ai.

Lai wa sai bat hpang masum ya shani hta mung muklum kata hkawm sa taw ai mawdaw, cycle ni hpe rim la nna masat 1 balik dap rung hta shaga la nna tsun sanglang dan ai hpang bai dat ya nna ndai bat hta gaw rim hpang nga sai lam hpe ginra masha ni tsun ai re.

Dai majaw dai ni muklum kata lam kaba hte lam kaji hkan hkawm sa nga ai sau bang ai mawdaw ni nnga ai daram rai mat nna Battery mawdaw cycle ni sha hkawm sa nga ai majaw muklum ting grai zim mat ai nga tsun ai.

Myen Hpyen Dap ni gaw mawdaw ni hpe tai/gup garan na gau na matu, rung bungli gawlaw ai masha ni hte NGO bungli galaw masha yawng hpe bat masum ya shagu nta kaw na sha bungli galaw na matu ndau da ai rai tim bat masum ya shagu sau bang lang ra ai mawdaw ni yawng hpe rim ahkyak la na matu tara shang ndau da ai lam nnga shi ai hpe chye lu ai.

Shiga-Htu Seng