Bat Mi Laman Jinghpaw Mung Kata Gasat Gala Majan 15 Lang Byin ai lam

Pajau Media

August 26, 2025

Lai wa sai Bat laman Jinghpaw Mung kata gasat gala majan 15 lang byin ai re hte gasat gala majan gaw Manmaw, Waimaw, Hpakant ginra hta byin law ai re hpe KIO shiga magam dap kaw tsun da ai kaw na chye lu ai.

Gasat gala majan hta Nbungli, Drone, Laknak Kaba hpan hkum jai lang nna htim gasat nga ai hta Myen hpyen dap maga na si hkala lam law ai zawn KIA pawng hpawm hpung maga na mung si hkala ai lam nga ai re hpe mung chye lu ai.

Grau nna Manmaw ginra htim gasat majan hta bat mi laman hta sha nbungli bawm 20 lang lahta, drone bawm 17 lang lahta, laknak kaba gaw 428 lahta gap bun ai re lam chye lu ai. N dai tang madun ai lam gaw Manmaw ginra kata bat mi laman Myen hpyen dap a htim gasat ai masa re lam chye lu ai.

Waimaw Lamyang Ginra, Hka Shi, Inlay Dai mayan hkan mung lagaw lam htu ai sha n-ga drone bawm shani shagu ngu na daram wa jahkrat bun nga dingyang re nga nna hkrun lam hkawm masha langai tsun ai re.

"Lamyang dai mayan de gaw shani shagu gap ai ga re, lai wa Lai sa gaw dingyang nga ai, anhte lai wa ai shaloi pyi sinat n sen ni grai na ai, si hkala ai gaw drone bawm na majaw grau sawng ai re" nga nna tsun ai re.

 Dai lam mayan hta mung gasat gala majan masa gaw aten n tam byin wa ai hte gasat gala n nga yang drone bawm wa jahkrat bun ai re majaw masa hta hkan nna she hkawm sa ra taw ai lam hkrun lam hkawm Mawdaw La ni tsun ai re.

Dai sha n-ga Da Jang Ginra de mung hpyen masa shaja hkat nga dingyang rai nna Hpakant ginra de mung August 20 ya hpang daw kaw nna hpyen shamu hkawm ai lam matut manoi galaw nga ai re hpe mung chye lu ai.

Shiga - Pyilan U