Bat Mi Laman Jinghpaw Mung Kata Gasat Gala Majan 48 Lang Byin Ai Lam

Pajau Media

November 3.2025

Jingghpaw Mung kata Waimaw, Manmaw, Hpakant ginra hkan gasat gala majan gaw shani shagu byin nga dingyang re hte October 27 kaw na November praw 2 bat mi laman gasat gala majan 48 lang byin ai lam chye lu ai.

Manmaw de gap gasat ai hta Nbungli Bawm 60 lang, Drone Bawm 48 lang lahta, Laknak kaba 317 lang gap bun ai hpe KIA shiga kaw na chye lu ai. Myen hpyen dap gaw gasat gala majan hta Nbungli Drone hpe madung jai lang htim gasat nga ai re.

Myen mungdan ra lata poi aten ladaw ni wa ai hte maren Jinghpaw Mung kata Hpyen shamu shamawt ai lam grau galaw ai sha n-ga shara shagu de shimlam la shamu shamawt nga ai rai nna Waimaw Da Jang maga de mung hpyen n-gun grai htu shadut ai lam dai ginra masha ni tsun ai kaw na chye lu ai.

Hkawm sa hkawm wa galaw ai ginra masha ni tsun ai hta Myen hpyen dap gaw n dai laman Da Jang hpyen man maga de Hpyen n-gun grai bai jahting da ai lam, dai maga de majan bai laja hkyen ai masa hpe mu ai lam tsun dan ai re.

Ya na zawn Mungdan kata byin ai majan hta Nbungli ni ladu lai jai lang htim gasat ai gaw Mungkan Hpyen tara hte n htan shai ai lam re nga nna Mungkan shinggyim uhpung uhpawng ni tsun dinglun da ai re. Manmaw Ginra de sha bat mi laman gasat gala majan 44 lang byin ai rai nna matut nna mung htu shadut nga dingyang re hpe chye lu ai.

Shiga - Pyilan U