Bat Mi Laman Jinghpaw Mung Kata Gasat Gala Majan 50 Jan Lang Byin Ai Lam

Pajau Media

November 17, 2025

Jinghpaw Mung kata gasat gala majan gaw lani hte lani grau grau gala wa ai re hte Myen hpyen dap gaw ntsa lam hku laja lana htim gasat nga dingyang re hpe mung chye lu ai.

Lai wa sai Bat laman hta mung Jinghpaw mMung Manmaw, Hpakant, Waimaw ginra ni hta gasat gala majan laja lana byin ai hta gasat gala majan 57 lang byin ai re hpe chye lu ai. Gasat gala majan byin ai hpe yu yang bat mi hte bat mi grau grau laja wa ai hpe mu lu ai re.

Myen hpyen dap gaw ntsa lam hku, Drone, Laknak kaba ni hpe madung jai lang nna htim gasat ai re hte bat mi laman Manmaw ginra hta Drone bawm 137 lang lahta, Laknak kaba 650 lang, Nbungli hku htim gasat ai hta 284 lang jahkrat bun ai lam nga sai lam KIA shiga kaw na chye lu ai.

Nbungli bawm gasat ai lam hpe majan laja nga ai Manmaw, Waimaw, Hpakant ginra sha n-ga KIA Dap Ba 7, Dap Ba 4, Dap Ba 1 ginra ni de mung Nbungli bawm wa gap gasat ai re hpe mung chye lu ai. Jinghpaw Mung kata ya aten majan laja dik ginra ngu na gaw Manmaw ginra rai nna bat mi laman ninghkap majan 47 lang byin ai re hpe mung chye lu ai.

Myen hpyen dap gaw Myen mungdan ting madang hku galaw na ra lata poi aten ladaw mung ni wa sai re majaw Ra poi galaw na shara maden ai hku htim gasat ai lam ni hpe matut manoi galaw nga ai re hte gasat gala n nga ai ginra hkan du hkra Nbungli bawm wa jahkrat bun ai majaw Jinghpaw Mung kata Mung masha si hkala hkrum ai lam shani shagu byin nga ai re hpe mung chye lu ai.

Shiga – Pyilan U