Bat Mi Laman Manmaw, Waimaw, Hpakant Ginra Kata Gasat Gala Majan 31 Lang Byin Ai Lam

Pajau Media

October 1, 2025

Jinghpaw Mung kata gasat gala majan gaw lani hte lani laja nga ai hta lai wa sai bat laman Manmaw, Waimaw, Hpakant Ginra kata gasat gala majan 31 lang byin ai lam na chye lu ai.

 Manmaw ginra kata nbungli bawm laja lana gap bun ai hta bat mi laman Nbungli bawm 101 lang, Drone bawm gaw 41 lang lahta, Laknak kaba 342 lang gap ai lam nga ai hpe chye lu ai. N dai gasat gala majan hta Myen hpyen dap maga na sum machyi ai lam law ai zawn pawng hpawm rawt malan hpung ni maga mung asak ap nawng, hkala hkrum ai lam shawng lam shi sawk ni tsun da ai re hpe chye lu ai.

Waimaw Lamyang ginra de mung myen hpyen dap lagaw lam htu shadut nga dingyang re hte gasat gala majan shaja hkat ai gaw shani shagu re hpe mung chye lu ai. Hkat cho, Da Jang maga de mung KIA pawnghpawm ni shala nga ai maga de Myen hpyen dap htu shadut wa ai majaw gasat gala majan byin nga ai re hte Hpakant ginra kata de mung shani shagu hpyen masa shaja hkat nga dingyang re lam chye lu ai.

 Ya tang madun da ai lam gaw lai wa sai laban bat mi laman hta ya gasat gala majan laja ai ginra hkan byin ai majan masa lam rai nna Myen hpyen dap gaw Jinghpaw Mung ginra de htu shadut htim gasat nga dingyang re sha n-ga KIO uphkang ginra kata de gasat gala majan n nga ai raitim Nbungli bawm jahkrat bun ai lam ni galaw ai re.

Lai wa sai September 29 ya shani Sadung kaw jahkrat ai Nbungli bawm a majaw asak si sum ai marai 11 du hkra nga sai rai nna marai 6 gaw tsi tsi hkam la nga ai lam mung chye lu ai. Ya aten Shanglawt uphkang ginra kata wa nga magang sai Mung masha ni Nbungli hpyen grai sadi maja let nga ra ai lam, masha hpawng chyawm ai Poi shingra galaw ai lam hpe mung koi gam ra ai lam KIA shiga magam dap lit hkam kaw nna mung tsun da ai re hpe mung chye lu ai.

Shiga- Pyilan U