Bawm Ngoi ai Nsen Ni Matut Manoi Na Ai Hte Nbungli Wa Gap ai Lam Ni Nga Ai Majaw Buga De Wa Sai Ni Myit Tsang ai Lam

Pajau Media

December 24.2025

Jinghpaw Mung kata majan gaw matut manoi byin nga ai hta gasat gala majan n nga tim n bungli bawm jahkrat ai lam matut manoi byin nga ai majaw ya aten mare buga de wa nga sai mung masha ni hta nbungli hpyen tsang ra ai hta lai nna kaga tsang ra ai lam gaw n nga ai re hpe chye lu ai.

"Hpyen yen dabang kaw nga ai mung shaning grai na sai, hpyen yen ai masha gaw law she law wa, dabang kaw matut nga na mung mayak grai law ai majaw ya buga de wa sai gaw re, raitim grai shim ai gaw n re, shawng lam de bawm nsen ni na ai hte nbungli, drone ni pyen wa wa re, dai sha anhte grai tsang ai. Dai hpawt maga de mung laknak kaba n sen grai bai na sai" Ga Ra Yang mare masha langai tsun ai.

Myitkyina-Manmaw lam mayan hkan na mung masha ni law malawng gaw hpyen masa hkrit tsang ra ai lapran tinang buga ginra de galaw lu galaw sha let wa nga magang sai re.

Buga de wa nna tinang htingput htingra hkan tam lu tam sha mai galaw ai raitim maga mi de hkam ja lam, hpaji lam hte seng nna myit tsang ai majaw hpyen yen mung masha n kau gaw buga de n gwi wa nna dabang kaw sha mai byin ai hku shanu nga ai ni mung naw nga ai re hpe chye lu ai.

Myen Hpyen Dap gaw KIA pawng hpawm hpung zing madu da sai ginra ni hkan lagaw lam htim gasat ai hku n galaw tim nbungli, drone bawm ni wa gap gasat ai lam ni galaw ai re.

Ya aten mung masha ni wa nga magang sai mare kahtawng ni gaw Shwe Nyawng Pin, Ga Ra Yang, Katsu, Dabak, Ja Pu mare ni rai nna mung masha ni gaw n tsa hpyen maja let sha nga ma ai lam chye lu ai.

Shiga - Pyilan U