Buga De Bai N Htang Wa Nga Sai Hpakant Nam Ya Ginra Hpyen Yen Ni Hpe Myen Hpyen Dap Kawn Ramma Mying Jahpan Hta Ai Lam Galaw Nga

Pajau media

December 18, 2025

Gasat gala majan a majaw hpyen koi yen hkawm mat nna ya buga de bai wa nga sai Hpakant Nam Ya mare kaw Myen Hpyen Dap kawn Asak 18 ning lahta ramma mying jahpan hta ai lam ni galaw ai majaw ginra masha ni myit tsang nga ma ai re.

Ya na zawn hta lahkawn ai lam hte seng nna ginra masha ni tsun maram da ai hta buga de bai n htang nga sai mung masha jahpan chye mayu ai kun? Shing nrai ra lata poi ni wa sai re majaw mying jahpan hta ai lam mung mai byin ai nga nna tsun maram da ai re hpe chye lu ai.

Ginra masha ni gaw ya aten majan masa naw hkrit tsang ra ai raitim law malawng gaw buga de bai wa nga sai rai nna n kau mung mare masha ni gaw majan hpang ai kaw nna dum nta n lu mat ai, hten za mat ai majaw bai wa nga na matu yak hkak nga ma ai re lam chye lu ai.

 Myen Hpyen Dap gaw mungdan kata asak ram sai ramma shagu hpyen magam n gun n mai ngu ai upade shagrin dat ai hpang kaw nna asak ram ai ramma ni hpe rim lahkawn nna shata shagu ngu na hpyen wunkat hpaw sharin nga ai re hpe mung chye lu ai.

Buga de bai wa nga sai mung masha ni hpe ya na zawn mying jahpan hta gahkyin ai lam ni galaw nga ai a ntsa ginra mung masha ni myit ung ang, myit tsang nga ma ai re hpe mung chye lu ai.

Shiga: Pyilan U