Buga De Nlu Wa Shi Ai Hpyen Yen Ni Hpe Nga Shara Lamu Ga Lajang Ya Na Lam Jinghpaw Mungdaw Hkringmang Salang Tsun Ai Lam

Pajau Media

20 January 2026

Lai wa sai 2011 kaw nna hpyen koi yen nga sai Mai Na KBC hpyen yen camp hta shanu nga ai hpyen yen mung masha law malawng gaw buga de mai nga sai majaw wa ai masha law sai raitim lam amyu myu a majaw n lu wa ai ni hpe Jinghpaw Mungdaw Asuya Hkringmang Salang Hkyet Hting Nan asuya hku na nga shara lajang ya na lam tsun ai hpe dabang masha ni kaw na chye lu ai.

“Mani camp de Jinghpaw Mungdaw Asuya Hkringmang Salang Hkyet Hting Nan sa ai ,shi mung law malawng gaw buga de wa na maga gaw grau tsun nga ai, tim lam amyu myu na majaw nlu wa ai ni hpe nga shara lajang ya na re da, gaw gap na gaw ya tinang nga taw ai nta, gawk ni run la nna bai wa galaw la na hku re” nga nna hpyen yen dabang hta shanu nga ai mung masha langai tsun ai re.

Mai Na KBC camp gaw du wa na March shata htum ai hte dabang dawm sai re majaw shaning 10 jan ning shanu nga sai hpyen koi yen mung masha ni gaw buga de wa magang sai ni nga ai zawn n kau gaw buga de wa gaw gap la na matu yak hkak ai hte mayak lam amyu myu nga ai majaw Jinghpaw Mungdaw Asuya Hkringmang Salang hpang de hpyi shawn ai hte maren ya na zawn lajang ya wa ai re hpe mung chye lu ai.

Ya aten dabang kata na Mung masha law malawng gaw buga de wa na matu hkyen shajin nga ma ai raitim ya aten na hpyen masa a majaw grai myit tsang nga ma ai re. Myitkyina Manmaw lam mayan na mare kahtawng ni hkan gaw shanglawt uphkang ginra rai sai majaw wa ai ni law tim grai shim lam hkam dahka n nga ai re lam buga wa sai mung masha tsun ai kaw na chye lu ai.

Ya aten camp dawm ai hpang Jinghpaw Mungdaw asuya kawn lajang ya na shara hkan nga na mung masha gaw marai 150 daram nga ai re lam chye lu ai. ya Aten Jinghpaw Mungdaw kata gasat gala majan lani hte lani laja nga ai hta hpyen koi yen shang wa ai mung law jat nga ai raitim Mai Na KBC camp gaw dawm sana re majaw hpyen yen masha n nan n hkap la ai mung lai wa sai shaning hkan na rai sai re hpe mung chye lu ai.

Shiga – Pyilan U