Buga Myi hprap Wan Rung kaw nna Myi hprap Wan jaw ai lam hpe aten masat nna garan jaw na lam mung masha hpang de ndau shabra ai lam

Pajau Media Channel

Buga myi hprap Wan Company gaw Myitkyina, Waimaw Mare kaba ni de Myi hprap wan madung jaw nga ai hta December (20) ya shani kaw nna lai wa sai ten na zawn hkying hkum (24) tup nlu jaw sai lam, Group (A,B) garan nna Hkying hkum mali din ai hpang kalang wan jaw ai ladat hte aten masat nna jaw sa wa na lam Buga Myi hprap wan Company kawn n dau da ai re.

Wan hpe aten garan masat nna jaw na lam hte seng nna Buga magam gun lit nga ai Salang langai hte hkrum shaga yu ai hta “ hpyen majan a majaw Wan jak n kau hten za hkrum mat ai, dai majaw Wan n-gun nlaw ai mayak ni nga ai majaw aten masat nna jaw ra ai masa byin mat ai re ” nga nna tsun dan ai re.

Hten hkrum mat ai Wan jak ni hte seng nna mung ya na zawn matut tsun da ai hta Buga wan a ningpawt Jak shadun ai shara Mali, Pajau hte shingnan jak rai nga ai Chyihpwi jak rung kaji ni, Maha myi hprap wan lam ni gaw lai wa sai October shata htum hte November praw laman Myen asuya hpyen dap hte KIA,PDF pawng hpawm hpung ni lapran gasat gala majan aten N bungli bawm ni a majaw hten hkrum mat ai hta Mali hka wan jak gaw ram ram hten za mat ai lam, Pajau hka wan jak mung loi li hten za mat ai lam tsun dan ai.

Mali, Pajau hka wan jak ni hte gindun ai Maha Wan Shadaw langai mung Gangdau Yang mare makau kaw daw hten mat ai majaw mung re lam,ya aten Myo mare kaba ni de madung jaw nga ai wan gaw Chyihpwi Hka wan jak kaw na sha rai nna Wan n-gun n law ai majaw Myi hprap wan hkying hkum (24) tup n lu jaw ai re lam mung chye lu ai.

Hten hkrum mat ai Wan jak ni hte Wan shadaw ni hpe bai gram sharai la na matu mung majan aten re majaw sa du gram sharai na matu naw yak nga ai masa re lam mung tsun dan ai re.

Shiga - Lay Pyay