Buga Wan Jak Rung Kawn Myihprap Wan Jaw Ai Lam Jahkring Ai Hpang Mung Shawa Ni Lam Amyu Myu Hku Na Yak Wa Ai Lam.

Pajau Media

April 21, 2026

Jinghpaw Mung, Myitkyina hte Waimaw muklum hta myihprap wan nlu wa ai hpang mung shawa ni a galu lu galaw sha lam ni lam amyu myu hku yak hkak wa ai hpe ginra masha ni kaw na chye lu ai.

“Wan nlu ai majaw Phone, Power bank wan n-gun bang ai, internet lang ai, hka bang ai, EV cycle wan n-gun bang ai, shat shadu ai kaw na hkawt myithprap wan rau lang ai ni yawng yak wa ai. Nkau seng kaw gaw hkying hkum hku nna gumhpraw jaw nna lang ra ai. Nkau gaw majoi lang na ahkang jaw ai mung nga ai. Rai tim mung aten na wa yang gaw yak wa ai” ngu amyu shayi langai tsun ai re.

Buga rung kawn myihprap nkau wan rung hkan hta wan n-gun bang na matu hkyen lajang ya ai ni nga ai zawn shara nkau hta gaw EV cycle langai hta 5000ks, Phone, Power bank langai hta kalang bang yang 1000ks grumhpraw jaw nna wan n-gun bang ra ai majaw yak nga ai hpe tsun dan ai re.

“Hka kalang bang yang hkying hkung mi hta mun masum jaw ra ai. Nta nkau hkan gaw n ta di wan jak rau du wa nna hka bang na i ngu nna daw jau ai mung nga ai. Shawng daw hta nau nlu maram ai rai tim nhtoi na na ya nga yang grai lu maram sai.Wan jak nga ai ni mung sau manu hte nloi ai. Shani ting wan jak jasu na nga yang 50000ks kaw na 70000ks ram gaw nlaw htum re” nga lahta kaw tsun ai amyu shayi matut tsun ai re.

Myihprap wan hpe madung jaw taw ai Chihpwi hka wan jak rung hpe bai gram lajang na matu lai wa sai April 18 ya kaw na bat lahkawng du hkra wan jaw jahkring na hpe Buga myihprap wan jaw jak rung kawn laika ndau da ai re.

Dai hpang dai ni April 21 ya hta 4 ya ngu na nhtoi du hkra myihprap wan nlu mat nna mung shawa ni lam amyu myu hku yak hkak nga ai hpe chye lu ai.

Shiga-Htu Seng

Photos crd-Social media