Bum Hka Kaba Ai Majaw Chihpwi Hka Wan Jak Hten Nna Mohnyin Ginra Ting Myi Hprap Wan N Lu Ai Lam

Pajau Media

August 12, 2024

Marang matut manoi htu sawng ai majaw Bum hka ni tung kaba wa nna Chihpwi Hka Wan Jak hten mat nna Myi hprap wan jak rung hkring mat ai majaw ya aten Mohnyin ginwang kata Myi hprap wan n lu ai re hpe chye lu ai.

“ Madung gaw n dai chihpwi Wan gang la ai da ai Jak rung ting nan hkring taw ai masa re, ya gaw Mohnyin ginwang ting ngu na daram myi hprap wan n lu mat ai re” nga nna tsun ai re.

Jinghpaw Mung hta August praw kaw nna marang matut manoi htu sawng ai majaw Bum hka ni Tung kaba wa ai re. Bum hka a majaw Chihpwi Hka wan jak rung kata de hten mat ai re lam, August 12 ya jahpawt daw kaw nna Mohnyin ginwang de wan n lu mat ai lam chye lu ai. Seng ang ai Wan Jak rung kaw nna mung jep joi nna byeng ai lam ni galaw nga ai re hpe mung chye lu ai.

Dai majaw Wan bai sa yang wan n-gun gasup ai lam ni mai byin ai majaw ahkyak ai jak rai ni lang na nga yang kalang ta hpaw ai lam ni, Hka chyup shaw ai ni hpe galaw na rai yang minutes 30 daram la yu nna she galaw mai ai lam Myi hprap wan rung kawn sadi jaw da ai re.

Ya aten Marang matut manoi htu sawng ai majaw bum hka tung kaba wa nna Jinghpaw Mung Laiza Muklum hta sha n-ga Lamu ga nem ai daw ni hta Hka lim kaba nga dingyang re hpe mung chye lu ai.

Shiga- hpring