Chyingma Pru Aten Du Wa Sai Raitim Hkrun Lam Pat Da Ai Majaw Ginra Masha Ni Shang Gumhpraw Tam Na Matu Yak Hkak Nga Ai Lam

Pajau Media

October 31, 2025

Myen hpyen dap gaw ya aten Jinghpaw Mung Putao ginra de hpyen man yawng wa ai hte Hpyen n-gun jahting ai lam galaw nga ai re hte Putao ginra kata hkawm sa hkawm wa lam ni hpe mung pat da ai majaw ginra masha ni gaw Chyingma tam aten du wa tim hkrun lam pat da ai majaw nlu hkawm ai lam ginra masha ni tsun ai.

Putao ginra nga Mung masha ni gaw shingra hpe machyu let ladaw hta hkan nna tam lu tam sha nga ai re hte n dai shata laman gaw Putao ginra kata Chyingma tam na matu grai hkyen shajin wa ai aten ladaw raitim hpyen masa a majaw hkrun lam ni pat rai nna yak hkak nga ai masa hpe ginra masha langai ya na zawn tsun ai.

“dai ning gaw Chyingma tam aten rawt na ngu myit da ai wa lam pat mat ai majaw myit da ai lam ni n byin sai, Bum Yi galaw tim Yu sha ai majaw dai ning gaw malu masha yak sai, grau nna gara de n mai shamu ai gaw Htang Ga lai Sinpraw hkran ginra nga ai ni grau yak sai, gara de mung n mai sa, malu masha ni ra mara ma hkra gaw Htang Ga lam hku Putao de na htaw shalai sha ai re wa Lam pat da, galoi she hpaw na kun aten na wa sai” nga nna ginra masha langai tsun ai re.

Putao ginra masha ni gaw ndai shata du ai hte shaning shagu Chyingma tam eawt ai re. Chyingma manu mung lu ai re majaw n dai hpang daw de ginra shang gumhpraw langai hku nna galaw wa ma ai re hpe chye lu ai.

Chyingma ni gaw Hka makau, n lung n pu zawn re ai hkan, Hka kau hku nna Wunawng hku pyen yu wa ai hpe hkam nna rim la ai re hpe chye lu ai.

 Hkawng Lang Hpu, Nawng Mung ginra na Bum hkan, Hka kaba makau hkan malu masha jarik ni gun nna Chyingma tam ai lam hpe galaw hpang nga ma sai re.

Raitim dai ning gaw hpyen masa lam amyu myu a majaw ginra masha n kau gaw Chyingma tam ai magam bungli hpe jahkring kau ra ai re hpe mung chye lu ai.

 Chyingma hpe Miwa ni gaw Lu sha hkan bang ai manam pyaw ai sama lu sha hpan hku jai lang ai lam, Lu sha hpan langai hku na gangau sha ma ai sha n-ga Tsi hku na mung jai lang ma ai re majaw laning hte laning manu lu ai re hpe chye lu ai.

Chyingma hpe lai wa sai shaning hkan gaw Joi mi kaw sen kru kaw na sen shi lapran manu lu ai re majaw ginra masha ni gaw madung shang gumhpraw langai hku galaw wa ai raitim dai ning Putao ginra hpyen masa shuk shanut ai majaw shawoi shaning na zawn wang lu wang lang tam hkawm na matu yak hkak dut dang ai lam ni nga ai re hpe mung chye lu ai. Machyang Baw Htang Ga Lam hpe Myen hpyen dap kawn lai wa sai October 10 jan ya kaw nna ya aten du hkra naw pat da ai re hpe mung chye lu ai.

Shiga -Pyilan U