Myen Hpyen Dap Gaw Phone Jep Ai Hta Kpay Gumhpraw Pru Shang Du Hkra Jep Nna Masha Rim Ai Lam

Pajau Media

October 3, 2025

N dai hpang daw de hkawm sa hkrun lam Myen hpyen dap shagyit hta Mung Chying masat hpe ja ja Jep joi ai lam galaw ai sha n-ga Phone shaga da chat box jep ai lam, Kpay Gumhpraw pru shang lam ni hpe du hkra jep ai re lam Myitkyina ginra masha langai tsun ai re.

Hkawm sa shagyit hkan Mung Chying masat hpe Computer hte matut da ai Jak rai kaw bang yang dai hte seng ai Data yawng hpe mu lu ai ladat hte jep joi ai lam galaw wa ai hta CDM galaw lai wa ai masha ni mung law law rim hkrum ai lam law wa ai re hpe chye lu ai.

2021 hpang daw kaw nna Black List jahpan bang da ai masha ni hpe ya aten du hkra rim ahkyak la ai majaw grai sadi maja ra ai lam ginra masha langai tsun ai.

" N dai bat laman sha re Balaminhtin kaw marai langai rim hkrum ai, Myen ni gaw ya rim hkrum ai wa hpe lai wa sai 2022 kaw na tam taw ai re da, shi hpe Kpay hku na PDF ni hpe gumhpraw shalai ya ai ngu na rim ai re da, shaning ni kade na tim lu hkra rim ai, tinang gaw aten ni na sai nga di malap mali rai n mai nga sai kade na tim rim ai re majaw grai sadi ra sai" nga nna tsun ai.

Myen hpyen dap gaw n dai hpang daw de masha jep joi ai hta madang tsaw ai Jak rai ni jai lang nna sawk sagawn jep joi ai lam laja lana galaw wa ai re. shanhte hku na Balcklist jahpan hta kalang bang da hkrum ai masha ni hpe ya aten du hkra jep joi rim ai lam ni galaw ai re majaw grai sadi maja let hkawm sa ra ai re hpe mung chye lu ai.

Shiga - Pyilan U