Putao Sinpraw Hkran Ginra Lam Hpe Ya Du Hkra N hpaw Ya Shi Ai Lam

Pajau Media

October 21, 2025

Lai wa sai October 11,13 ya laman Machang Baw ginra Htang Ga mare makau de majan byin ai hpang Kaw nna Sinpraw hkran ginra lam pat da ai hpe ya aten du hkra n hpaw ya shi ai re hpe chye lu ai.

Hkrun lam masa hte seng nna ginra masha langai tsun ai hta " lam pat da ai shi ya daram rai wa sai, ngai gaw ma shalet wunkat wa lung ai re wa ya du hkra mare de n lu wa na Machyang baw kaw chyat taw ai, Lam hpaw na gaw naw na na zawn mung nga ai, n kau gaw Jawngma wa sa let nga taw ai, Buga de Yi gaw shangut la ra, wa gaw n lu wa re di yak nga ai" nga nna tsun ai re.

Putao Sinpraw hkran hkawm sa hkrun lam gaw dai langai sha nga ai re hte Machyang Baw Ginra hkan na Mung masha ni mung Bum de Shau Gaw sun galaw, Ja htu ja shap bungli ni galaw nna hkawm sa ai hkrun lam re sha n-ga Bum de nga ai ni mung dai lam hku na sha malu masha htaw shalai ginlen la ai lam kaba langai re majaw ya na zawn lam pat da ai aten na yang ginra masha ni a matu grai yak hkak ai lam chye lu ai.

Dai Ginra hta lai wa sai ten hkan gasat gala majan hte seng nna myit tsang na lam n nga ai raitim Myen hpyen dap uphkang wa ai hpang kaw nna Htang Ga makau mayan hkan du hkra Myen hpyen dap P.T.Ts pawng hpawm hpung ni shamu shamawt shara la wa ai majaw gasat gala majan ni byin nna ya na zawn hkrun lam pat da ra ai madang du mat ai re hpe mung chye lu ai.

Putao Sinpraw Hkran Ginra hta Dinghkyet, Marawt Ga mare, Ding Ga, Dingsa, Mapyung Ga, Machyang Ga mare ni matut da ai ginra re. Dai ginra de matut nna mung gasat gala majan byin wa mai ai majaw ginra masha ni sadi maja let nga ra taw ai masa re lam mung chye lu ai.

Shiga - Pyilan U