Dainai Ginra Namgawn Myen Hpyen Dap Hpe Zing Madu La Lu Sai Raitim Hpyen Masa Gaw Grai Shaja Hkat Nga Ai Lam

Pajau Media Channel

19th March, 2024

Danai Ginra Masat (2) Dap Ba, Masat (14) Buga Dap Dung Ginra kata na Namgawn Myen Hpyen Gumshem Dap hpe KIA pawng hpawng hpung ni Mar (18) ya jahpawt htim gasat hpang nna shana daw hta zing la lu sai raitim hpyen masa gaw grai shaja hkat nga ai masa re lam chye lu ai.

Hk.L.Y (297/318) pawng hpawng hpyen hpung ni hpe March (18) ya jahpawt (5:00) AM daram kaw na htim gasat hpang ai hta danai D.K.Ts kaw nna mung gasat poi byin ai shara de laknak kaba matut manoi gap bang ai hte jet nbungli hte (3)lang, Bom-5 wa jahkrat bun ai raitim shana (8:00) PM aten daram hta KIA pawng hpawng hpung ni kawn gasat zing la lu ai hte post hpe wan nat jahten kau sai lam shawng lam lit nga ni tsun shana wa ai kaw na chye lu ai.

Jinghpaw mung ginra hta March (7) ya kaw nna byin hpang wa ai htu shadut htim gasat majan hpang kaw nna ya aten du hkra rai yang myen hpyen gumshem hpyen dap (30) jan hpe gasat zing la lu sai re hte Myen hpyen bawng masha marai (300) hkawt hpe rim mazing la lu ai lam sawk sagawn chye lu ai.

Shiga - Hugawng