Danai Ginra Ja Maw Hkan Shani Bungli Shabrai Hpe Ka-ni Nanghpam Jaw Nna Galaw Shangun Ai Lam

Pajau Media

August 22, 2025

Jinghpaw Mung Danai ginra kata na Ja maw ni hta Ka-ni Nanghpam hte seng nna ahkyak la ai lam n nga ai majaw Ja maw hkan bungli galaw nga ai masha ni ka-ni lu sha masha grai law wa ai lam Danai ginra masha ni tsun ai kaw na chye lu ai.

Ja maw ginra hta Yama, Ka-ni hpraw, Ka-ni chyang ni hpe ja htu bungli masha ni jai lang law wa ai hte ka-ni nanghpam a mayam de du nga ai lam bungli galaw masha langai tsun ai re.

“ Lauban ni gaw bungli manu hpe gumhpraw n jaw mat sai, dai na malai Ka-ni jaw ai, bungli galaw ba hkam na matu Yama hpe tara shang jai lang shangun ai hku rai nga, kadai mung n rim ma ai, bungli madu ni kaw ka-ni nanhpam hpan hkum nga ai ” nga nna tsun ai re hpe mung chye lu ai.

Bungli galaw masha ni tsun ai hta bungli madu ni nan shani bungli galaw manu hpe ka-ni jaw nna galaw shangun ai gaw shanhte a bungli grau awng dang na matu ka-ni jai lang shangun ai re lam, dai hpe ahkyak la hparan ai masha n nga ai majaw mung Ja maw ginra hta ka-ni lu sha ai lam grau grau sawng wa ai re lam chye lu ai.

 “ Maw ginra kaw ka-ni nanghpam hpe wang lu wang lang mai lang ai, loi loi hte mai lu ai, gumhpraw gaw ka-ni nanghpam kaw sha shama law ai, sumtsan kaw na ja gumhpraw tam nga ai n kau gaw ka-ni nanghpam na majaw asak si sum ai ni mung nga ai” nga nna ginra masha langai mung tsun ai re.

Danai ginra gaw KIA/PDF sha n-ga SNA hte Myen hpyen dap pawng hpawm hpung ni shamu shamawt nga ai ginra langai re hpe mung chye lu ai.

Shiga – Hting Nai