Danai Ginra Kata Matut Manoi Hpyen N gun Htu Shadut Nga Ai Lam

Pajau Media

6 January 2026

Lai wa sai December bat lahkawng kaw nna Hugawng Danai ginra de Myen Hpyen Dap P.T.Ts. pawng hpawm hpung ni hpyen shamu wa ai re hte ya aten du hkra hpyen n-gun htu shadut dingyang re lam chye lu ai.

Myen Hpyen Dap pawng hpawm hpung ni gaw nbungli bawm, laknak kaba ni hte matut manoi htu shadut ai majaw KIA Dap Dung 14 ginra de htim gasat wa ai re hte KIA maga kawn gan yen da ra ai lam ni nga ai re hpe chye lu ai.

Matut manoi Danai Nam Byu Maga de bai htu shadut nga dingyang rai nna dai ginra maga gaw Ja maw, Payin Maw ginra re hte sut hpaga hku nna grai mai galaw sha ai ginra re majaw ya na zawn htu shadut wa ai lam re nga nna ginra masha ni tsun maram nga ma ai re.

Ya aten Myen Hpyen Dap gaw Danai Wai Law Ja maw maga de mung shang shara la nga ai re hte Ja maw dap ni hkan mung masha ni tawn kau da ai arung arai ni hpe sawk la ai lam ni galaw nga ai re hpe chye lu ai. Wai Law Ja maw kaw Myen Hpyen Dap shamu shamawt nga ai majaw bungli hkring ra mat ai lam mung chye lu ai.

Ya hpyen N-gun Htu shadut nga ai Nam Byu maga de mung laknak kaba, drone bawm ni matut manoi gap bun ai hte hpyen masa grai shaja hkat nga dingyang re hpe mung chye lu ai.

Shiga - PyilanU