Danai Ja Maw Ginra Majan Loi Zim Ai Majaw Ja Maw De Bungli Shang Na Matu Hkyen Lajang Nga

Pajau media

February 19, 2026

Danai ja maw ginra hta hpyen masa loi zim taw sai masa re majaw ja maw ginra hta bungli galaw sha nga ai mung masha ni gaw tara shang lam kaba hpaw ai lam n nga shi tim koi lam hku nna ja maw de shang hpang nga sai lam ja maw kaw bungli galaw masha tsun ai re.

Ya aten na ja maw ginra masa hte seng nna ja maw kaw bungli galaw ai mung masha langai tsun ai hta, “Ja maw ginra hkan ya gaw shang lawt ni bai lu sai re majaw gaw mi na zawn re bungli bai mai galaw sai nga shanhte tsun ai raitim mung shimlam hpe gaw pahkam n jaw lu ai, dai majaw ja galaw ai ni grai myit ung ang taw ai, galaw ra na zawn n galaw ra na zawn hte raitim maw de gaw bungli galaw ai ni gaw grai du taw sai,” nga nna tsun ai re.

Ja maw ginra kaw bungli galaw ai mung masha ni mung kajawng kaja majan byin wa ai re majaw asak lawt daw sha hprawng pru wa ai re hte ja maw de bai mai galaw sai nga tim n nan kaw na bai hpang la ra ai masa byin nga ai re lam chye lu ai. Ya aten bungli shang galaw ai masa n rai shi tim galaw na matu hkyen shajin taw ai masa re hte jakli gau ai masha ni mung ntsa hpyen hpe hkrit tsang ra ai masa re lam tsun ai re.

“Shimlam hte seng nna kadai mung အာမခံ (Pahkam) n lu jaw ai re majaw n gwi galaw ai, moi ya majan byin ai shaloi mung Lapu HKa, Wai Law maw hkan jak gau ai mu ai hte drone bawm ni wa jahkrat ai majaw grai hkrit tsang taw ai masa re,” nga nna tsun ai re.

Danai ja maw sa lam kaba Mai Hkun lam hpe gaw P.T.Ts ni naw pat da dingyang re lam chye lu ai. Ya aten shada gap hkat ai lam n nga ai re majaw ja maw ginra bungli shang na matu law malawng gaw maw de shang nga sai raitim shawoi na zawn bungli hpe galaw na matu myit tsang lam law law naw re lam naw kaw bungli galaw nga ai masha ni tsun ai re.

Myen hpyen dap P.T.Ts pawng hpawm hpung ni gaw lai wa sai 2025 december shata daram kaw nna Danai maw ginra ni de htu shadut htim gasat wa sai majaw ja maw ginra hpe shata lahkawng jan daram du hkra pat da ra ai re lam chye lu ai.

Shiga – Pyilan U