Jinghpaw Mung Kata Aten Ntam Gasat Gala Majan Laja Wa Mai Ai Lam Dkb Naw Bu Tsun

Pajau Media

February 19, 2026

Jinghpaw mung kata Myen hpyen dap htu shadut htim gasat nga ai Manmaw, Waimaw, Hpakant, Indaw Gyi, Putao hte Nawng Mun ginra ni hta aten ntam gasat gala majan laja wa mai ai majaw ginra masha ni hku nna hpyen masa hpe sadi maja let nga ra ai lam KIO shiga magam dap lithkam DKB Naw Bu tsun sadi jaw da ai re.

Ya aten Jinghpaw mung hta Myen hpyen dap kawn htu shadut ai lam hte nbungli dingsa gasat ai lam ni jahkring hkring byin nga ai rai nna lahkawng maga gap gasat ai lam nga ai majaw mung masha ni hkawm sa hkawm wa lam ni grai sadi ra ai lam, mai byin ai daram masha hpawng chyawm ai lamang ni n galaw na matu tsun sadi jaw da ai re hpe mung chye lu ai.

Lai wa sai February 1 ya kaw nna 14 ya laman Jinghpaw mung Manmaw, Hpakant, hte Waimaw ginra ni hta gasat gala majan 26 lang byin sai re hpe chye lu ai. Ya aten Myen hpyen dap gaw Hpakant ginra sha n-ga hpyen man shagu ngu na de hpyen n-gun, malu masha matut manoi htu shadut nga dingyang re hpe mung chye lu ai.

Shiga- Hpring