Hpakant Ginra De Myen Hpyen Dap Kawn Matut Manoi Htu Shadut Nga

Pajau Media

February 19, 2026

Ya aten Hpakant ginra Mashi Kahtawng maga de gasat gala majan laja nga ai hta Myen hpyen dap pawng hpawm hpung ni gaw Ka Mai-Hpakant lam hku nna Lawng Hkang maga de matut manoi htu shadut hkyen nga ai lam chye lu ai.

February 18 ya jahpawt daw hta mung Mogawng ginra စကခ ( Ts.K.HK 3) n pu na hpyen hpung ni hte Shahtu Zup Min Ze Thant P.T.Ts pawng hpawm hpung ni gaw Ka Mai-Hpakant lam de grai shamu shamawt nga ai majaw kajawng kaja majan laja wa na hpe ginra masha ni grai myit tsang nga ma ai re lam chye lu ai.

Ka Mai-Hpakant lam kaw shamu shamawt nga ai Myen hpyen dap pawng hpawm hpung ni gaw Lawng Hkang maga de laknak arung arai, malu masha ni jat bang nga dingyang re lam chye lu ai.

Hpakant ginra de gasat gala majan laja wa ai gaw lai wa sai January 30 daram kaw nna rai sai hte bat lahkawng jan daram na wa sai re. Ya aten shada gap gasat lam kachyi mi zim taw ai masa raitim myen hpyen dap kawn laknak kaba gap shadam ai lam gaw dingyang galaw nga ai re. February 16 ya shana hta mung Hpakant Byuha Kawng kaw nna laknak kaba gap shadam ai lam galaw ai re hpe mung chye lu ai.

Ya na zawn myen hpyen dap kawn laknak kaba gap shadam ai lam ni a majaw mung masha ni nga ai mare kahtawng hkan laknak kaba wa hkrat kapaw nna mung masha asak si sum, hkala sawng ai lam, dum nta hten za ai lam ni gaw shani shagu ngu na ram byin hkrum nga ai re hpe mung chye lu ai.

Shiga- Pyilan U