Danai mawdaw lam ding yang hte Hpakant ginra na Hpyen Yen Ni A Dum Nta Kata Na Manu Dan Ai Arai Ni Lagu La Hkrum Taw Nga ai lam

Pajau Media

July 14, 2025

Majan a majaw hpyen yen koi hkawm nga ai Danai mawdaw lam ding yang hte Hpakant ginra na Mung masha ni a dum nta law law hta manu dan ai arung arai ni hpe lagu la hkrum taw nga ai lam ginra masha ni tsun ai.

Lagu la hkrum ai arai ni gaw Mawdaw Cycle ni ma lawm manu dan ai arai ni hte nta kata hkan na arai ni lawm ai lam chye lu ai.

Hpyen yen ni gaw majan byin wa ai shaloi tinang dang di ai daram arai nkau mi sha la hkawm ai majaw arai law malawng gaw dum nta kaw sha zaw hkat tawn da kau ai nga tsun ai.

Rai tim aten ladaw na hkra hpyen koi yen taw ten dum nta na arai ni lagu la hkum nna manu dan ai arai ni ma lagu la hkrum ai lam chye lu ai. Dai hta n-ga hpyen dap lahkawng maga majan matut manoi byin taw ai hta nkau ginra ni hta myen hpyen dap n-gun law law hte dap shara jahkrat da ai majaw dum nta bai wa na matu hkrit tsang taw ra ai ngu tsun ai.

 Grau nna Hpakant ginra hta lagu lagut law ai ten si nat hte gap sat ai lam ni masha mat ai lam ni hte majan mung laja taw nga nna shani shagu ngu na daram nbungli bawm drone hte gap gasat ai lam mung matut manoi laja nga dingyang re.

 Bum shara hkan hte tinang dang di ai daram koi yen hkawm nga ai hpyen yen ni jinghku nta hkan yen hkawm nga ai ni marai 2000 jan rai taw sai lam hpe matut chye lu ai

Shiga-Htu Seng