Danai Wai Law Ja Maw Maga De Min Zay Thant P.T.Ts Hpung Ni Gaw Ja Galaw Ai Ni Hpe Bungli Sawng Na Rai Yang Gumhpraw Shawng Bang Ra Na Lam Tsun

Pajau Media

January 14, 2026

Myen Hpyen Dap a npu na Wa Ra Zup Min Zay Thant P.T.Ts. hpung ni gaw ya aten Danai ja maw ginra ni hkan shamu shamawt shara la hkawm nga ai re hte gasat gala majan laja lana byin ai lam n nga tim hpyen n-gun htu shadut ai hte hpyen masa shaja hkat nga ai masa rai na ja galaw ai masha n kau hpe gumhpraw shawng jaw nna she bungli bai galaw shangun ai lam ni nga ai re hpe chye lu ai.

Ja maw ginra masa hpe chye ai mung masha langai tsun ai hta “Jahtu Zup Min Zay Thant hpung ni gaw Wai Law Ja Maw hkan ja htu bungli galaw na rai yang gumhpraw sen 60 shawng bang nna she bungli shang shangun na nga tsun ai lam ni nga ai” nga nna Wai Law Ja Maw kaw bungli galaw mung masha langai tsun dan ai re.

Danai Ja Maw ginra hpyen masa grai shaja hkat wa ai majaw ya aten ja maw n kau hta bungli ni yawng jahkring da ai re hte M.Z.T hpung ni kawn gaw naw nga ai ja galaw ai lauban n kau hpe shanhte hpyi ai daram gumhpraw jaw yang she bungli bai matut galaw shangun ai masa ni byin nga ai re hpe chye lu ai.

Lai wa sai December 20 jan ya daram kaw nna Danai Ja Maw ginra hkan Myen Hpyen Dap P.T.Ts pawng hpawm hpung ni shara la wa ai hte n bungli bawm ni gap bun ai majaw ya aten Ja Maw ginra kata bungli galaw sha nga ai ni mung yawng hprawng yen ra mat ai re hpe chye lu ai.

January 10 ya shani hta mung Wai Law ja maw mayan de hpyen n-gun jat htu shadut wa ai majaw KIA pawng hpawm hpung ni hkap gasat ai majaw gasat gala byin ai lam nga sai re.

dai ginra hta ya aten Myen Hpyen Dap pawng hpawm hpung ni shamu shamawt hkawm nga ai Pat Maw, Wai Law ja maw ni hkan gaw tsep kawp bungli n mai galaw mat ai hte kaga maw n kau hta jak kaji ni hte loi li mai galaw ai masa gaw re nga nna maw ginra masha tsun ai kaw na chye lu ai.

Shiga – Pyilan U