Dawhpum Yang Ginra Hta Myen Hpyen Dap Ni Kawn Nbungli Bawm Sa Gap Bun Ai A Majaw Ginra Masha Si Hkala Hkrum Ai Lam Nga

Pajau Media

20 February 2025

Nmawk gingwang Dawhpum Yang ginra hta myen hpyen dap ni kawn nbungli bawm sa gap bun ai a majaw si hkala hkrum ai ginra masha nga ai hpe chye lu ai.

February praw (19) ya jahpawt hkying 1:25 am aten hkan Dawhpum Yang ginra Wa Ngang mare hta myen hpyen dap ni kawn nbungli bawm hte sa gap bun ai hta ginra masha marai (7) asak si sum nna marai (5) hkala hkrum ai lam nga ai hpe ginra masha ni tsun ai kawn chye lu ai.

Asak si sum mat ai ginra masha ni gaw U Maung Oo dum nta masha marai (7) yawng asak si sum hkala ai kaw asak (10) ning ram re ai ma (3) lawm nna hkala hkrum ai ni gaw asak (60) ning re ai U Win Naing hte asak (68) ning re ai shi a madu jan Daw Khin Yi, asak (53) ning Daw Win Kyaine, asak (10) ning Mg Kaung Htet Lwin hte asak (27) ning Daw Su Hlaing ni re hpe chye lu ai.

Myen hpyen dap ni gaw majan nbyin ai ginra hta nbungli bawm ni hte majoi ayai aya gasat ai ni matut galaw taw ai majaw mung masha ni si hkala hkrum ai hte dum nta htenza ai ni law law nga ai hpe chye lu ai.

Lai wa sai February praw (18) ya shani hta mung Hugawng ginra Ledo mawdaw lam ntsa kaw nga ai Wara Zup mare hpe myen hpyen dap ni kawn majan nnga nbyin ai raitim mung masha ni hpe shingte da let raoi mara bawm wa jahkrat bun ai a majaw ginra masha langai asak si sum nna dum nta nkau wan hkru htenza mat ai re.

Shiga – Zau Mai